Bibiliya ivuga iki ku gutandukana kw’abashakanye (divorce) ?

Muri iyi minsi icyibazo cyo gutandukana kw’abashakanye kigenda gifata intera ndende ugereranyije no mu bihe byashije aho usanga abagabo cyangwa abagore baratawe rwihishwa cyangwa se binyuze mu mategeko bagasaba gutandukana. Uko iki kibazo kigenda gifata intera usanga kigenda cyadukira n’ ingo z’abakristo kandi mbere aribo bari intangarugero mu kubaka ingo zitanyeganyega. Impamvu ni nyinshi zitera abagabo gusenda abagore babo ariko tugiye kureba icyo Bibiliya igenda ivuga k’ugutandukana kw’abashakanye(gatanya: Divorce).

1.Gatanya ivuguruza igitekerezo cy’Imana

Imana yatanze amabwiriza ku kiremwamuntu ivugako, umugabo akwiye gusiga se na nyina agasanga umugore bakabana akaramata bakaba umubiri umwe (Itangiriro2:24)
Abafarisayo bigeze bagerageza Yesu bamubaza kubijyanye no gushyingirwa ndetse no gusendana kw’abashakanye , nawe abasubiza abibutsa ko Iyabaremye mbere yabanje kurema umugabo n’umugore nk’umugambi w’Imana wo kubana kw’abashakanye kugirango babe umubiri umwe. Mu byo Imana yari yarateguye nta gatanya kubashakanye yagombaga kubaho.(Matayo 19:4-6)

2. Gatanya ihabanye n’ibyanditswe byera

M u rwandiko Pawulo yandikiye Abefeso mu bice bitanu asaba abakristo kuyoborwa n’umwuka wera kugirango babashe gukora ibihuye n’ugushaka kw’Imana, kandi agereranya umugabo nka kristo n’umugore nk’itorero. Asaba abagabo gukunda abagore babo nkuko kristo akunda itorero akaryitangira ni nako umugabo akwiye kwitangira umugore we. Avuga neza ko umugabo akwiye gukunda umugore nkuko akunda umubiri, ukunda umugore akaba yikunda ubwe . (Abefeso 5:25-29)
Umugabo afite uruhare nk’urwa Kristo n’umugore na we afite uruhare nk’urw’itorero iyo buri wese akoze neza inshingano ze baba bibutsa abantu urupfu rwa Yesu hamwe n’ubuzima bw’itorero. Ariko iyo bombi batabikoze bagasendana baba bavuguruje ibyanditswe byera icyo gihe baba bashatse kuvugako K risto azata umugeni we ariryo torero. Kubw’iyi mpamvu rero Imana yanga uruka gatanya(divorce).

3. Imana yanga gatanya

Malaki asobanura impamvu Imana itanezezwaga n’amaturo y’abantu “nyamara mukabaza muti impamvu ni iki ? impamvu ni uko Uwiteka yabaye umugabo wo guhamya ibyawe, n’umugare wo musore bwawe wariganije nubwo yari mugenzi akaba mwasezeranye isezerano” icyatumye Imana ibagira umwe nuko yashakaga urubyaro rwubaha Imana. Hano Imana ibuza abantu kuriganya umugore wo musore bwe kuko Uwiteka yanga ugusenda. (Malaki 2:14-15)
Mu muteguro w’Imana ugushyingiranwa byari ukugirango haboneke urubyaro rwubaha Imana, ariko none gatanya yavuguruje umugambi w’Imana bituma abanu bayo bangirika, imiryango irasenyuka nicyo gituma Imana yanga ugusendana kwa bashakanye.

4. Mose yemeye gatanya kugirango akumire ibyaha

“ Umuntu narongora umugeni maze ntamukundwakaze kuko hari igiteye isoni yamubonyeho, amwandikire urwandiko rwo kumusenda arumuhe amwirukane mu nzu ye. 2 namara kuva mu nzu ye , yemwererwa kugenda agacyurwa n’undi …” (Gutegek 24:1-4)
Muri make hano icyatumye Mose yemerera gatanya byari ukugirango agabanye imitima yari yuzuye ibyaha. Ikigaragara abagabo bihutiraga cyane gusenda abagore babo ku mpamvu zitandukanye.
Hano hari aho yabuzaga kugarura mu rugo umugore wamaze gusendwa, aha bisaba gutekereza neza kucyo ugiye gukora bivugako nta buryo ubwo aribwo bwose gatanya yakorwamo bukaba bwiza.

5. Yesu yabujije gatanya uretse gusa habaye gucana inyuma

“ Ariko ndababwira yuko umuntu wese uzasenda umugore we atamuhora gusambana, akarongora undi azaba asambanye. Kandi ucyura uwasenzwe na we aba asambanye” (Matayo 19:9). Yesu yabibwiye abantu kubera imitima yabo yari yinangiye ,Mose yabemereye gusenda abagore nyamara ntabwo byahozeho mbere.

6. Pawulo yabujije gatanya uretse gusa habaye gutabwa

“Usibye gusenda uwasambanye, Pawulo avugako mu gihe umugabo wizera cyangwa umugore wizera yasenzwe nutizera ibyo biremewe. Hano mu 1 abakorinto 7:15 haravugango “ Icyakora wa wundi utizera, niba ashaka gutana atane. Mwene data w’umugabo cyangwa w’umugore ntaba agihambiriwe iyo bimeze bityo kuko Imana yaduhamagariye amahoro”

Mu gushaka kumva neza icyo Pawulo ashaka gusobanura reka twibaze uti “ Guhambirwa ni iki?” ku murongo wa 39 “ umugore ahambirwa ku mugabo we akiriho, ariko iyo umugabo apfuye nta kimubuza gucyurwa n’uwo ashaka, icyakora iyo ari uri mu Mwami wacu.”
Tugeranyije iyo mirongo yombi tubona nezako uretse uwapfakaye wenyine wemerewe kongera gushyingirwa hamwe n’uwatawe n’uwo bashakanye utizera gusa. Ni muri ibi byiciro bibiri isezerano rita agaciro.

Birababaje rero kubona umubare w’Abakristo batandukana, wenda kungana n’uw’abantu batizera. Bibiliya yerekana inshuro nyinshi ko Imana yanga urunuka gutandukana kw’abashyingiranywe (Malaki 2:16), kuko kwiyunga no kubabarirana ari byo bigomba kuranga ubuzima bw’abizera (Luke 11:4; Abefeso 4:32).

Ubuntu buberaho kubabarira ibyahise n’ibyenda kuba. Ibyanditswe byera bitwibutsa uburyo Yesu ubwe yegereye umugore wari umaze gutandukana n’abagabo batanu (Yohana 4) ntiyitaye kubindi ahubwo yibanze ku mutima we amuha ku mazi y’ubugingo. Dukwiye gukora ibimeze bityo hamwe n’imbabazi z’Imana.
Imana iduhe kugira ubuntu kugirango turusheho gukora ibyo Bibiliya itwigisha.

Ismael [email protected]