Appendicite, indwara itirindwa

Nkuko tubikesha urubuga santé medicine, Appendicite ni indwara ifata agahago gato gafashe ku rura runini, mu ruhande rw’iburyo bw’ inda y’umuntu, inzobere mu by’ubuzima zivuga ko nta mpamvu izwi yaba itera uburwayi bw‘aka gahago, ariko ngo iyo hagize ikijyamo nk’amabuye n’indi myanda urura ruba rutabashije gutambutsa ngo bisohokane n’undi mwanda bishobora kukangiza bikanakazibya bityo umuntu akaba yagira ibibazo bikomeye byo kurwara appendicite

Ubusanzwe iyi ndwara ishobora kugaragara ku muntu uwo ari we wese ariko ngo ikunda kwibasira abana, ingimbi ndetse n’abangavu, iyi ndwara kandi ngo yibasira 5% by’abatuye isi ndetse yaramuka itivujwe mu buryo bwihuse ikaviramo umuntu urupfu.

Ni iki gishobora gutera appendicite?

Kugeza ubu impamvu zitera iyi ndwara ntabwo ziramenyekana neza, ariko akenshi usanga ngo iterwa n’uko umwanda wakagombye gusohokana n’indi uba wabaye mwinshi hanyuma bigatera iyi nyama yo mu nda kunanirwa, ari byo bihita bibyara appendicite, ikindi nuko indwara zimwe za zimwe nk’ikibyimba ndetse n’indwara zifata urwungano ngogozi bishobora kuba zimwe mu mpamvu z’iyi ndwara.

Dore bimwe mu bimenyetso by’indwara ya appendicite

Kubabara mu gifu
Kubabara mu nda yo hasi ariko mu ruhande rw’iburyo kuko ariho appendice iherereye
Kugira umuriro mwinshi
Kugira inda ikomeye
Kwituma impatwe
Kugira isesemi rimwe na rimwe ukanaruka

Urubuga santé medicine rukomeza ruvuga ko appendicite ari indwara ishobora kuvurwa igakira, iyo ivuriwe igihe, ariko iyo bitinze ishobora guhitana uyirwaye, ku bw’ibyo, abantu bakaba bakangurirwa kwihutira kujya kwa muganga igihe cyose bumva mu nda bitagenda neza kugira ngo muganga asuzume niba atari iyo ndwara yamufashe ishobora no kumwambura ubuzima mu gihe itavuriwe ku gihe dore ko nta bundi buryo buhari bwo kwirinda iyi ndwara.

Ubusanzwe abantu bamenyereye ko iyo bafashwe n’uburwayi bwo munda bakeka ko ari inzoka barwaye bagahita bivura magendu ariko mu byukuri batazi icyo barwaye, iyi ngeso ni mbi kuko ifite ingaruka ku buzima bw’umuntu uyigira, kuko niba wumva ufite ikibazo cyo munda, ni byiza ko ugana muganga akagusuzuma ubundi akaguha imiti ijyanye n’uburwayi ufite.

Source: santé medicine
Liliane [email protected]