Amasomo twakura ku nzozi za Yozefu wagurishijwe na bene se

Buri ngorane cyangwa ibihe bitandukanye bigaragara muri bibiliya biduha amasomo yo kwigiraho kandi tukayakoresha muri uru rugendo rw’ubuzima rugana Imana. Bimwe ni ibyabaye kuri Yozefu, umuhungu wa Yakobo yakundaga cyane kurusha bene se(Itangiriro37:3). Uretse kuba yari yaramudodeshereje ikanzu nziza y’amabara menshi, Yozefu yarose inzozi zasohoreye kuri bene se bamwangaga.

“Yozefu arota inzozi azirotorera bene se, barushaho kumwanga. Arababwira ati “Ndabinginze nimwumve inzozi narose: ngo twahambiraga imiba mu murima, umuba wanjye urahagarara urema, iyanyu miba ikikiza uwanjye, iwikubita imbere.”
Bene se baramubaza bati “Ni ukuri wowe uzaba umwami wacu? Ni ukuri wowe uzadutwara?” Izo nzozi ze n’ayo magambo ye bituma barushaho kumwanga.
Yongera kurota izindi nzozi, azirotorera bene se ati “Nongeye kurota izindi nzozi: ngo izuba n’ukwezi n’inyenyeri cumi n’imwe binyikubise imbere.” Azirotorera se na bene se, se aramucyaha aramubaza ati “Izo nzozi ni nzozi ki? Ni ukuri jye na nyoko na bene so tuzaza twikubite hasi imbere yawe?” Bene se bamugirira ishyari, ariko se ajya yibuka ayo magambo. »( Itangiriro 37:5-11)

Ibi ni ibintu 3 twakwigira ku nzozi za Yozefu:

1.Igihe Imana iguhaye kurota, biba ari ukuri kuzasohora

Yozefu yarose inzozi zikomeye bivuzeko yari gukomera akarusha na se umubyara. Tuziko Imana ariyo yahaye Yozefu kurota izo nzozi nk’uko byasohoye mu mibereho ye , maze aba umuntu wabaye uwa kabiri ukomeye mu gihugu cya Egiputa. Mu gihe mbere yari umwana muto wasuzugurwaga na bene se.
Inzozi ziturutse ku Mana ziba ari ukuri kandi iyo igihe kigeze zirasohora.

2.Abantu bamwe bashobora kutishimira icyo Imana yaguteguriye

Bene se wa Yozefu bamwanze kurushaho ubwo yabarotoreraga inzozi ze kuko zari zidasanzwe maze bamugirira ishyari, bamugura n’Abanyegiputa.
Igihe tubonye inzozi, icyerekezo cyangwa ibyo tuzageraho bivuye ku Mana, abantu bamwe ntibazabyishimira. Bazaba abantu bahora bakurwanya batifuza ko watera imbere ariko Imana niyo iba igufiteho ijambo rya nyuma.

3.Imana izasohoza umugambi wayo ku gihe cyagenwe

Yozefu yari akiri umwana igihe yarotaga kandi turabizi neza byari kuzafata igihe ngo inzozi ze zibe impamo.Yari afitevimyaka 17 igihe yarotaga kandi mu myaka 30 nibwo zasohoye igihe yakoreraga Farawo( Itangiriro 41:46)

Igihe Imana iduhaye inzozi, umugambi wayo ntuzareka kugera ku ntego kandi izasohoza ibyo yavuze kuri wowe igihe kigeze.

Sophie @agakiza.org