Amasomo 9 twakwigira ku gitangaza cyo ku nyanja itukura

Mu rugendo tunyuramo tujya mu masezerano y’Imana dukunda guhura n’inzitizi ariko ntabwo bikuraho umugambi w’Imana kuri twe. Abisirayeli nabo byababayeho ubwo bavaga muri Egiputa bahunze Farawo, bageze imbere bahura n’inyanja itukura.

Imana ikora igitangaza ibambutsa inyanja itukura. Ijambo ry’Imana rifite imbaraga. Ibyo Imana yakoranye n’abatubanjirije byadufasha natwe muri iki gihe kunyura mubyo tugenda duhura nabyo nkuko Mose n’ubwoko bwa Isirayeli bwambutse inyanja itukura.

 Imana izi ibyo ikora

Kuva: 13:18 “Ahubwo Imana ibagendesha ibizigu, ibacishije mu nzira inyura mu butayu ikajya ku Nyanja Itukura, Abisirayeli bava mu gihugu cya Egiputa bafite intwaro”.
Nubwo uburyo Imana yakuyobora kwaba gutandukanye nuko ubyifuza Imana iba izi ibyo iri gukora, iyo ukomeje inzira ikweretse ubona ko hari impamvu ikunyujije muri iyo nzira uri kunyuramo.

 Imana iyobora inzira tunyuramo

Kuva: 13:21 “Uwiteka ku manywa yabagendaga imbere ari mu nkingi y’igicu ngo abayobore, nijoro yabagendaga imbere ari mu nkingi y’umuriro ngo abamurikire babone uko bagenda kumanywa na nijoro.
Imana ntabwo ijya itureka ngo tugende twenyine. Inking y’igicu n’umuriro byasimbuwe n’Umwuka Wera, Yesu yadusezeranyije ngo atuyobore mu bushacye bw’Imana.

 Imana ifite ububasha bwo guhindura imitima y’abami ku bwacu

Kuva:14:4 “Nanjye ndanangira umutima wa Farawo abakurikire. Nziheshereza icyubahiro kuri Farawo no ku ngabo ze zose, Abanyegiputa bamenye ko yuko ndi Uwiteka.”
Imana ifite byose mu kiganza cyayo. Ishobora guhindura ibintu byose n’imitima y’abakomeye ku bwacu.

 Aho tutabona inzira Imana yo iba ihabona inzira

Kuva: 14:10 “Farawo abatuze, Abisirayeli bubura amaso babona Abanyegiputa bahuruye inyuma yabo baratinya cyane. Abisirayeli batakira Uwiteka.”
Nubwo wabona ibintu byarangiye ariko umugambi w’Imana uba ugikomeje. Imana irihariye mu gukora.

 Ntidukwiye guhanga amaso cyane ibibazo ahubwo dukwiriye kugirira Imana icyizere

Kuva: 14:14 “Uwiteka ari bubarwanirire, namwe mwicecekere.”
Abisirayeli bari bafite ubwoba ntacyizere bafite, ariko Imana ntabwo yabyitayeho yabasabye kuyubaha bagakora ibyo ishaka gusa.

 Amasengesho ni ingenzi ariko Imana iti “Ni igihe cyo gukora”

Kuva: 14:15 “Uwiteka abaza Mose ati ni iki gitumye untakira? Bwira Abisirayeli bakomeze bagende.”
Hari igihe natwe twisanga mu gihe nk’iki. Ariko Imana ikatwereka umwanzuro mwiza twafata mu gihe gikwiriye.

 Imana ikora ibikomeye ariko icyenera mbere ko tubanza tukayumvira

Kuva: 14:16 “Nawe umanike inkoni yawe, urambure ukuboko hejuru y’inyanja uyigabanye, Abisirayeli bace mu Nyanja hagati nko ku butaka.”
Inyanja yarakamye kubwo gukora ibyo Imana yari imubwiye gukora. Banyura ahumutse. Natwe dukwiye kumvira Imana tukanyura ahumutse nti tunyure mu byondo tukareka hakumuka tukanyura ahumutse nkuko Imana yavuze.

 Ntabwo turi twenyine. Imana iri hagati yacu n’ababisha bacu

Kuva: 14:19 “Marayika w’Imana wajyaga imbere y’ingabo z’Abisirayeli arahava ajya inyuma yabo, ya nkingi y’igicu iva imbere yabo ihagarara inyuma yabo.”
Dukwiye kugira icyizere mu Mana kuko Imana yohereza abamarayika baducungira umutakano kugirango abanzi batatugirira nabi.

 Imana ni Imana y’ibitangaza

Kuva: 14:31 “Abisirayeli babona ibikomeye Uwiteka yakoresheje imbaraga ze ku Banyegiputa, ubwo bwoko butinya Uwiteka kandi bizera Uwiteka n’umugaragu we Mose.”
Iyo Mana yakamije inyanja itukura ubwoko bwa Isirayeli bukambukira ahantu humutse ikongera ikagarura amazi Abanyegiputa bakarengerwa n’uyu munsi iracyahari kandi iracyakora, uko yari n’uyu muni niko iri kandi niko izahora n’iteka ryose.

Hari ibyo duhura nabyo bimeze nk’inyanja itukura ariko utitaye kubyo uri guhura nabyo Imana ntabwo ijya ihinduka, iri kumwe natwe kugirango iturengere mu byo duhura nabyo byose. Iyo dushyize ibyiringiro byacu no kwizera kwacu muri Yesu, tuba dufite ubwishingizi ko atazaduhana cyangwa ngo atazatureka na gato.

Infochretienne.com

Tuyishime [email protected]