Amashyi n’impundu bikomeje kuba urwanaga muri New Melody.

New Melody ni umutwe w’abaririmbyi umaze kumenyerwa cyane mu karere k’ibiyaga bigari, ndetse no hakurya y’amazi magari, kubera umurimo bakora wo kuririmba indirimbo zihimbaza Imana, ndetse gutoza abatoza b’abayandi makorari atandukanye akorera umurimo w’Imana mu matorero (Amadini) atandukanye.

New Melody mu myaka ishize, yari igizwe n’urubyiruko rw’abasore n’inkumi cyane kuruta abubatse, n’ubwo yari ifite abajyanama b’ababyeyi (Bubatse ingo), ariko yo ubwayo yari yiganje mo abasore n’inkumi. Kuri ubu rero ibirori birarimbanije muri aba bakozi b’Imana. Amasezerano yo kubaka ingo ari gusohora umusubizo.


Umutwe w’abaririmbyi New Melody

Mu kwezi kwa mbere k’uyu mwaka ni bwo umuyobozi w’iri tsinda Madame Neema Marie Jeanne yarushinze n’uwo yabereye Nyampinga akamubera Rudasubwa, bwana Aime Ndayambaje.


Neema M. Jeanne n’umukunzi we N. Aime ku munsi w’ubukwe bwabo

Hari nyuma gato ya Modeste Nzabonimpa ucuranga akanaririmba muri iri tsinda.


Modeste Nzabonimpa n’umukunzi we ku munsi w’ubukwe bwabo

Modeste nawe yari yanzikiye aho Madame Marie Claire Uwineza yari yacukirije mu gihe gito mbere ye.


Claire Uwineza n’Umukunzi we ku munsi w’ibirori byabo

Kuri ubu aba baririmbyi bambariye gucyuza ubukwe bwa Kayitare Adrien na Uwimbabazi Agnes bazahabwa isakaramentu ryo gushyingirwa ku munsi wejo taliki ya 23 Nzeri 2017, isaa munani (14h00) mu rusengero rwa ADEPR SEGEEM Rwampara, mu mujyi wa Kigali.


Adrien Kayitare n’umukunzi we bitegura kurushingana

Nyuma yo kuva mu muhango wo gushyingira aba bageni, imiryango n’inshuti z’abageni ndetse na New Melody bazakomereza ibirori mu nzu y’ibirori (Salle) yitwa : « Maranatha) iherereye i Gikondo.

Muri uyu mutwe w’abaririmbyi « New Melody » haracyarimo abandi basore n’abakobwa baciye akenge, bisobanuye ko inyenyeri ya Kiberinka ikimuritse. Umugisha wo kwakira no gutanga abageni baracyawufite.


Muri New Melody haracyarimo impumuro y’ibirori


New Melody ku ruhimbi mu gikorwa cyo guhimbaza Imana

Abitegura kurushinga tubifurije ibirori byiza bishoza ibindi, n’urugo ruhire ruvuga impundu, izibakamirwa ntizigateke !

Niyondora Vedaste [email protected]