Amabwiriza 12 yagufasha kwiga neza ishuri ry’ Imana Pastor Desire

Nzi gucishwa bugufi nzi no kugira ibisaga, n’aho naba ndi hose n’uko naba ndi kose, nigishijwe uburyo bwo kwihanganira byose, ari uguhaga, ari ugusonza, ari ukugira ibisaga cyangwa gukena. (Abafiripi 4:12)

1.Kwiyandikisha: Burya iyo wakiriye Kristo uba wiyandikishije mu ishuri ry’ Imana kuko nyuma yo kwakira agakiza utangira kwigishwa kwitondera amategeko y’ Imana (Matayo 28:19-20).

2. Kugira inyota yo kwiga ku bushake: Hari abanyeshuri bahatirwa n’ababyeyi kwiga ariko mu mitima yabo batazi akamaro ko kwiga. Kugira ngo wige neza bisaba guhindura imyumvire (Matayo 5:6). Burya impamvu yo gukora ikintu runaka, iba irusha agaciro icyo kintu ubwacyo.

3. Gushaka ibikoresho by’ishuri: Ibikoresho by’ishuri ni ukuba ufite Bibiliya Yera n’ibindi byose byagusaba gusobanukirwa icyo Imana igushakaho. Itorero rya mbere ryashishikariraga ibyo intumwa zigishaga (Ibyakozwe 2:42). Bibiliya iravuga muri Zaburi ngo “nabikiye ijambo ryawe mu mutima kugira ngo ntagucumuraho (Zaburi 119:11). Ijambo rya Kristo ribe muri mwe rigwiriye (Abakorosayi 3:16).

4. Gukurikiza amabwiriza y’ishuri (disipulini): Buri kigo kigira amabwiriza yacyo. No mu nzira ijya mu ijuru ntabwo wahinduka umwigishwa mwiza udakurikiza ikinyabufura uhabwa n’ishuri (ntiwaba umwigishwa mwiza udafite disipulini y’ishuri).

5. Kwiga amasomo yose uko akurikirana: Amasomo aba atandukanye. Buri wese afite iryo ari kwigishwa. Burya ntibakwigisha gusonza no guhaga, gukena no gukira, gusuzugurwa no kubahwa, kubyara no gupfusha icya rimwe. Ahubwo habaho uburyo bikurikirana, bahereye ku kigero cy’ubwenge umwigishwa afite (Yesaya 30:20).

6.Kwiga ku giti cyawe (si byiza ko abantu bose ubahindura abanyeshuri): Hari igihe Imana ihitamo kugushyira mu ishuri ry’ikigeragezo, hanyuma ugahora uhanganye n’abantu ngo ntibansuye ndwaye, ntibamfasha, kuki bansuzugura, ba runaka ni bo babigizemo uruhare n’ibindi. Irinde ko abantu bose ubagira abanyeshuri mwigana. Ni wowe uri kwigishwa ahubwo tega amatwi neza mwalimu wawe, abari ku ruhande ubihorere.

7. Gukoresha neza igihe cyo kuruhuka: Imana ntiyishimira kubabaza umuntu iteka ahubwo imugirira ibambe (Amaganya ya Yeremiya 3:32). Imana yanyujije Abisirayeli mu ishuri ry’imyaka 40 mu butayu ariko buri gihe yabahaga manu. Birashoboka ko Imana yaguha akaruhuko ntiwumve ko warangije kwiga ahubwo tekereza ko amasomo azakomeza, wikwifata nk’uwarangije. Ibigeragezo bihindura envelope bizamo ariko bizahora bihari.

8. Kudakopera mu ishuri: Hari igihe umunyeshuri aba umunebwe mu kwiga agashaka gukopera ibyo abandi bakoze. Rimwe na rimwe iyo tuje mu rusengero dusanga abashima ko babyaye, baguze amazu, imodoka n’ibindi, ugahita wumva wamera nkabo. Ese uzi barabigezeho banyuze mu zihe nzira? Itonde wige neza umugisha wawe uzaza nusoza amasomo.

9. Kutagira amashyushyu yo kurangiza igihe kitaragera: Iyo uhuye n’umuntu ari mu kigeragezo, burya icyifuzo aba afite ni ukurangiza icyo kigeragezo. Amasengesho menshi aba abaza Imana ngo bizarangira ryari? Ariko mbere yo kwifuza kurangiza, ese wumvise icyo mwalimu yashakaga kukwigisha? Ibaze bagiye batanga uruhusha rwo gutwara imodoka ku bantu batize neza! Ibaze bagiye baha dipolome abaganga batize neza! Ese aho ntibamara abantu? Ikitwishe muri iyi nzira ni uko duhura n’abitwa abakozi b’Imana basimbutse amasomo, bakava mu ishuri batarangije.

10. Guhora witeguye ikizamini gitunguranye: Ikigaragaza ko umwana yize neza ni uko akora ikizamini. Burya ibigeragezo ducamo iyo bije kureba ko ijambo ry’ Imana twumvise twarishyizeho umutima, akenshi birangira dutsinzwe kuko tutize dushyizeho umwete. Ikizamini rimwe na rimwe kiratungurana n’ibigeragezo nabyo biradutungura.

11. Kutagirana ibibazo n’ abarimu: Abarimu batwigisha baratandukanye. Burya Imana yahisemo ko umugore/gabo wawe yakubera mwalimu, umwana, pasiteri, inshuti magara, akazi kawe, amagara yawe, ibyo wari wiringiye byose bigahinduka ibyo kukwigisha. We kugirana ikibazo n’abalimu ahubwo shyira umutima ku masomo yawe.

12. Guhorana ibyiringiro ko rimwe amasomo azarangira: Humura n’ubwo kwiga bibabaza ariko rimwe amasomo azarangira kandi uzasanga kwiga byari byiza. Burya kwiga birahenda ariko ubuswa buhenda kurushaho. Niba leta idaha akazi abantu batize, Imana nayo ntiyaha akazi abantu itigishije neza. Urugero: Uzasome neza ibyo abigishwa bize mu myaka 3.

Mbifurije amasomo meza n’amahirwe yo kurangiza neza kandi ku gihe.
Pastor [email protected]