Abasize ibyabo bagakurikira Yesu, yabahaye ibiruta incuro 100…! – Simeon Ngezahayo

Ni uko Petero aramubwira ati “Dore twebweho twasize byose turagukurikira.” Yesu aramubwira ati “Ndababwira ukuri yuko nta wasize inzu, cyangwa bene se, cyangwa nyina, cyangwa se, cyangwa abana, cyangwa amasambu ku bwanjye no ku bw’ubutumwa bwiza, utazahabwa ibiruta incuro ijana muri iki gihe cya none, ari amazu, ari bene se, ari bashiki be, ndetse na ba nyina, n’abana, n’amasambu hamwe no kurenganywa, maze mu gihe kizaza akazahabwa ubugingo buhoraho” Mariko 10:28-30.

Iki ni ikiganiro Yesu yagiranye n’abigishwa be, ariko by’umwihariko Petero kuko ari we wabajije Yesu ikibazo cyari kimuhangayikishije. Yibazaga ibyo yasize byose ku bwo gukurikira Yesu, akibaza icyo azunguka. Natwe hari ibyo twasize, ndetse ni byinshi. Icyo Yesu yashubije Petero ni igisubizo ku byo tujya twibaza mu buzima.

Yesu aramubwira ati “Ndababwira ukuri yuko nta wasize inzu, cyangwa bene se, cyangwa nyina, cyangwa se, cyangwa abana, cyangwa amasambu ku bwanjye no ku bw’ubutumwa bwiza, utazahabwa ibiruta incuro ijana muri iki gihe cya none, … hamwe no kurenganywa, maze mu gihe kizaza akazahabwa ubugingo buhoraho.”
Yesu amaze guhamagara abigishwa be, yabatumye kwamamaza ubutumwa bwiza bw’ubwami bw’Imana ariko ababuza kujya bitwaza uruhago rurimo ifeza, cyangwa imvumba, cyangwa inkweto, … (Luka 10:5).

Amaze gutuma abigishwa 70, baragiye bamamaza ubutumwa bwiza kandi bamara igihe bakora ibyo n’ubwo nta feza, ibyokurya cyangwa kunywa cyangwa imyambaro bari barajyanye. Ni nk’uwavuga abamisiyoneri b’iki gihe. Ibyabo barabisize, ariko batungwaga n’abakunzi ba Yesu babagaburiraga bakanabambika, barangiza bakabasabira umugisha bagakomeza ahandi.

Urumva nk’umuntu wasize isambu kandi ari yo ivamo ibimutunga, yagombaga kugira impungenge kuko bamaraga igihe kirekire bagenda. None se ni bangahe, abo tuzi n’abo tutazi basize ibyabo, ingo n’imiryango yabo, bakaba babayeho kandi basangira n’abo batigeze kumenya, bakabambika, bakabakorera ubukwe, bakabarihira amashuri (bamwe bararangije), bakababera ba se na ba nyina? Aba tubasanga mu mujyi wa Kigali n’ahandi mu byaro, kandi nta kindi gituma babikorerwa keretse ku bw’ubutumwa bwiza. Nta bandi kandi babibakorera, ni abakunzi ba Yesu.

Reka nitangeho urugero, jyewe mama wambyaye ni umwe, ariko ba mama mfite ni benshi kandi sinigeze mbasaba kumbera ba mama kuko mfite ubyitwa kandi ubikwiriye. Ariko ku bw’urukundo rw’abana b’Imana, babonye ko ari ngombwa kumbera ba mama. Uzi kugira ngo umuntu yemere kwitwa nyoko atarakubyaye? Reka abavandimwe mfite bo sinabababara ngo mbarangize, ba papa na bo ni uko! Nawe rero ni uko, ndetse ababyeyi bo bagira abana benshi batabyaye, imfubyi na zo zikagira ababyeyi batazibyaye. Mbega ukuntu Yesu ari mwiza!

Abakunzi ba Yesu tunejejwe n’umuryango yaduhaye mu nzu y’Imana. Nkimara gukizwa nasize incuti nyinshi, kuko nari umunyeshuli kandi w’umuhanga kandi uturuka mu muryango wifashije. Bitewe n’urukundo Imana inkunda, ntiyashimye ko ngumana n’incuti zo mu isi zitazagira icyo zimarira, ahubwo yampaye agakiza kugira ngo nyuma izampe ubugingo buhoraho mbane na yo iteka ryose. Nyuma yo gukizwa rero nahereye kuri zeru, mbona incuti nshya n’ababyeyi n’ibindi ntatekerezaga. Nzi ko hari benshi byagendekeye nkanjye.

Imana ishimwe! Jyewe mbona incuro ijana (100) zararenze, kuko yambabariye ibyaha ntari kubona ikiguzi ntanga ngo mbabarirwe, yongeraho ababyeyi benshi, abavandimwe n’incuti n’indi migisha nkenera nkiri mu isi.

Muri iki gihe cya none, bigaragara ko gukurikira Yesu bizana inyungu muri byose kuko birimo isezerano ry’ubuzima bwa none n’ubuzaza na bwo. Urukundo Imana idukunda ni isoko y’imigisha yose: ubuzima buzira umuze, ubukungu, umutekano n’ibindi bifitanye isano no guhirwa mu buzima. N’ubwo abakiranirwa rimwe na rimwe bagubwa neza, ariko uburyo bwizewe bwo gutera imbere ni ukubaha Imana no gukomeza amategeko yayo. Tukiri mu isi rero, imigisha izatuzaho kuko twubashye Imana, ndetse no mu gihe kizaza Yesu aduhe ubugingo buhoraho.

Gusa ibi byiyongeraho kurenganywa (Mariko 10:30), kuko isi iratwanga, n’imibiri yacu ikababazwa tuzira urukundo dukunda Yesu. Yesu ntiyigeze akuraho kubabazwa (Mariko 13:13; Yohana 15:18), ariko hamwe n’ibyo yadusezeranije ko tuzahozwa ku bw’imigisha azadukubira incuro 100, zirimo incuti no kugubwa neza k’uburyo bwinshi. Niba Imana ari incuti yacu, tugomba kwihanganira ibigeragezo kandi tukayishimira ko yaturemeye umunezero usaga hagati y’imibabaro tunyuramo.

Simeon Ngezahayo