Abakijijwe muzabamenyera ku mbuto zabo, itsinda ry’abakijijwe ryo uzarimenyera ku rukundo rubaranga

Muzabamenyera ku mbuto zabo Matayo 1:20
Nuko mwere imbuto zikwiriye abihannye. Matayo 3:8
Igiti cyiza cyose cyera imbuto nziza ariko igiti kibi cyera imbuto mbi. Matayo 7:17-18

Iyi ni imirongo igaragaza ko bikwiye ko umuntu aba agomba gusa n’ibyo avuga. Uvuga ko akijijwe wese agomba kwera imbuto z’abihannye nziza ziryohera abatarihana nabo bagahindukirira Umwami Yesu.

Nibyo koko agakiza kaba mu mutima nk’uko benshi bakunze kubivuga, ariko kagaragarira inyuma, kuko Yesu yari abizi ko abantu badafite ubushobozi bwo kureba mu mutima yatanze ahandi kabonekera. Ni ku mbuto z’abihannye kandi nazo zirahari zizwi, bivuze ngo iyo izo mbuto zitagaragara ku muntu, mu kuri ntiyarakwiriye kuvuga ko akijijwe kuko biba ari ibinyoma. Abagalatiya, 5: 22-26

Ibi ntibibujije ko hari n’abagaragaza inyuma ko bakijijwe ariko bahishe ibikorwa byinshi by’ubupagani mu mitima, kuko hariho abavugisha Imana iminwa ariko imitima yabo iyiba kure. Ariko ntidukwiye kubuzwa gukora ibyiza n’abakora ibibi, ahubwo ingeso zabo mbi tugomba kuzikosoza ingeso zacu nziza bityo bose bakamenya ko turi abakirisitu by’ukuri.

Aha ni ku muntu umwe.
Reka turebe no ku bantu barenzer umwe bari hamwe nk’itsinda runaka

Akenshi usanga abantu bakijijwe bakunze kuba hamwe mu matsinda atandukanye. Ayo gusenga, ayo kuririmba, ayo kwizigama...

Aya matsinda ariko usanga abamo ibibabazo bitagira ingano. Ikibazo si uko ibibazo bibamo kuko igihangayikishije si ibibazo ahubwo hahangayikishije ibisubizo by’ibibazo kuko ari byo bituremera umunezero n’amashimwe mu isi. Kandi n’ubwo bo bakijijwe ariko aho bari na satani arahari ngo ababangamire. Kandi ni rusange haba ku bakijijwe no kubadakijijwe ahari abantu ntihabura urunturuntu. Ahubwo ikibatandukanya ni ukwibaza ngo: “Ibyo bibazo bikemuka gute?”

Itsinda ry’abantu bakijijwe ubuzima bwaryo bwose bwakagombye gushingira ku rukundo. Ibibazo byabo byose byakagombye gukemukira mu nzira y’urukundo.
Yesu yabwiye abigishwa be ati: “ Ibyo ni byo bose bazabamenyeraho ko muri abigishwa banjye, nimukundana.” Yohana 13:35

Nk’uko urukundo ari rwo rwahuje umunyabyaha n’ubugingo buhoraho kubw’amaraso ya Yesu, Yesu yifuza ko ababana bitirirwa izina rye bose bagombye kubakira imibanire yabo ku rukundo kuruta ibindi byose.

Urukundo rutuma abantu bihanganirana, bahugurana, bafashanya, basurana, basangira, basengerana, batabarana... Niba ubona itsinda ubamo ridashingiye ku rukundo ntuzatangazwe no kubonamo imirimo mibi iruta n’iyo abitwa abapagani bagira, kuko si itsinda ry’abigishwa ba Yesu. Itsinda ry’abigishwa ba Yesu iteka rigira intego zitandukanye ariko ikibahuza kuruta ibindi byose ni ugukundana hagati yabo.

Ubwiriza akoresheje imbuto afitiye Imana umusaruro mwinshi kandi Imana izamuhemba cyane kuruta ubwiriza akoresheje umunwa gusa nta mbuto, uwo we ntan’ingororano azabona ku Mana ahubwo izamuhana.

Imana idushoboze kwera imbuto zikwiriye abihannye zatuma abantu abadakijijwe bifuza gusa natwe. Imana idushoboze kandi kuzana impinduka nziza z’urukundo mu matsinda tubamo, bityo abantu benshi batubonemo iyo mbuto bitumen bifuza kubana natwe cyangwa kubaho nkatwe. Ubwo ni bwo butumwa bukomeye bw’ibanze bubanziriza bimwe byose dukorera mu rusengero byitwa umurimo w’Imana.

Vedaste [email protected]