ADEPR BYUMBA: CHRORALE TURI MU RUGENDO YATOYE ABAYOBOZI BASHYA

Nyuma y’uko taliki 03 Ugushyingo 2013 komite y’inzibacyuho y’iyi chorale yariho icyuye igihe hagatorwa komite nshya , ku cyumweru taliki 19 Mutarama 2013 ahagana saa tanu ni bwo ku rusengero rwa ADEPR ahari icyicaro cy’itorero ry’Akarere ka Gicumbi, umudugudu wa Bugunga habereye umuhango wo gusengera komite nshya ya korali TURI MU RUGENDO.

Mbere y’uko iyi komite isengerwa ikaba yarabanje kumurikira ubuyobozi bw’itorero hamwe n’abaterankunga ba Choale iteganyabikorwa bihaye (Plan of Action) rishobora gutuma iyi korali irushako kwiyubaka, bakaba baragaragaje ko ku ikubitiro bateganya ivugabutumwa mu ntara zitandukanye, amahungurwa mu byiciro by’abagize korari ndetse no kurushaho kwiyubaka.

Uwo muhango ukaba warayobowe n’umushumba w’itorero ADEPR Akarere ka Gicumbi Rev. Past MURINDAHABI Canisius, afatanyije n’abayobozi b’umudugudu wa Bugunga, abayobozi b’amakorali akorana umurimo n’iyo korali imbere y’imbaga y’Abakristo.

Rev. Past MURINDAHABI Canisius

Mbere yo gusengera iyo komite, umuyobozi yabanje kubasomera ijambo ry’Imana muri 1Timoyeyo 4:12-13 handitswe ngo “Ntihakagire uhinyura ubusore bwawe, ahubwo ube icyitegererezo cy’abizera ku byo uvuga, no ku ngeso zawe no ku rukundo, no ku kwizera no ku mutima uboneye. Kugeza aho nzazira, ujye ugira umwete wo gusoma no guhugura no kwigisha.”

Yakomeje abwira abari bagiye gusengerwa ko bagiye kurambikwaho ibiganza n’abayobozi bafatanyije n’itorero kugira ngo umurimo Imana ibahamagariye bawukorane umwete bafite umurava kugira ngo bahanurire itorero.

Muri uyu muhango abayobozi b’itorero bakaba baremereye iyi korari ko aho bazajya bacyenera ubufasha ko bazajya babubaha kandi ko bazajya baba hafi kugira ngo babagire inama.

Twakwibutsa ko iyi korali kugeza ubu mu mwaka w’2012 yamaze gushyira ahagaragara indirimbo z’amashusho mu muzingo yise “URI IMBONI YANJYE,” ndetse kugeza ubu ikaba taliki 26 Ukuboza 2013 yarashyikirijwe igihembo cyiswe SIFA AWARD 2013 na ISANGE.COM LTD nka korali y’umwaka yagize Audio nziza.

Komite nshya yasengewe