Urugendo rutagatifu rwo gusura Israel

Nkuko byifuzwa n’abakristo benshi kuzakandagiza ibirenge byabo ku butaka bwera bwa Isirayeli twifuje gusubiza iki cyifuzo binyuze mu bufatanye bw’agakiza.org na Miracle Pool Church( Ikarabiro) twabateguriye urugendo mu kwezi kwa 10 taliki ya 12/10/2016 tukazagaruka 21/10/2016

Day 1
Hazabaho gufata indege tugana I CAIRO Mu Misiri, aho urugendo rwacu ruzatangirira, tureba aho ubwoko bwa Isirayeli bwababarijwe imyaka 430. Tuzahaguruka I Kigali saa kumi n’igice tugere I CAIRO saa sita za ni joro, habeho gufata ifunguro rya nijoro no kuruhuka twitegura gutangira ingendo zacu zo gusura mu gitondo kare.
Tuzarara i cairo

Day 2
Nyuma yo gufata amafunguro ya mu gitondo, tuzerekeza ku musozi w’ i Horebu ariwo bakunze kwita umusozi wa Mose, dusure aho rya shyamba ryashyaga ntirikongoke ryari riri, aho Imana yavuganiye na Mose imutuma gusubira muri Egyputa gucyura ubwoko bwa Isirayeli , aha tuzafata umwanya wo kuramya, guhimbaza Imana no gusenga. Nyuma yaho tuzazamuka agasozi kaduhesha kubona ikibaya Abisirayeli barwaniyemo n’Abameleki igihe Aroni na Uri bari bafashe Mose amaboko.
Tuzarara i Cairo

Day 3
Nyuma yo gufata amafunguro ya mu gitondo, tuzasura umugezi wa Mara (Spring of Moses) aho Mose na Aroni bakoreye icyaha cyo kutumvira Imana, imaze kubabwira ngo bakubite urutare n’inkoni ya Mose maze bahe abisirayeli amazi Tuvuye aho tuzasura I Gosheni aho Abisirayeli bari batuye, dusure umugezi nyina wa Mose yajugunyemo akato ka Mose, dusure n’aho Yozefu na Mariya batuye igihe cy’imyaka itatu n’igice, barahungishije Yesu Herode ashaka kumwica.
Tuzarara Sinai

Day 4
Mu gitondo kare tuzahaguruka, nyuma y’amafunguro ya mu gitondo, dufate urugendo tujya mu gihugu cy’amasezerano, aho tuzambuka inyanja itukura. Tumaze kwambuka umupaka wa Eilate, tuzasura I Sodoma aho umugore wa Loti yahindukiye igishyitsi cy’umunyu, dusure Eingedi aho Dawidi yahungiye akahandikira na Zaburi nyinshi, dusure Yeriko dukomeza tujya I Nazareti ariho tuzarara
Tuzarara i Nazareti

Day 5
Tuzabyuka mu gitondo dusura I Galilaya, aho tuzakorera amasengesho yacu mu bwato twiyibutsa uburyo Yesu yajyaga avugira ubutumwa mu Nyanja y’I Galilaya igihe abantu babaga babaye benshi. Nyuma tuzasura Caperinawumu, umusozi w’Abahire (Matayo5: 1- 10), Dusure na Tabgah aho Yesu yatuburiye amafi n’imigati.
Tuzarara i Nazareti

Day 6
Tuzakomeza ingendo zacu I Nazareti tureba aho Yesu yakuriye, tuzasura kandi I Cana aho Yesu yakoreye igitangaza cya mbere cyo guhindura amazi divayi, dusure umusozi wa Tabor, umusozi wo guhindurirwamo, aho Yesu yahindukiye ari kumwe na Mose na Eliya, tuzasoza umunsi tunjya ku Nyanja ya Yorodani aho Yesu yabatirijwe na Yohana Baptista
Tuzarara i Nazareti

Day 7
Tuzasura Yeriko aho tuzabona umusozi Yesu yageragerejweho na Satani, tujye I Betaniya iwabo wa Razaro, turebe imva yari ahambye mo igihe Yesu yamuzuraga. Tuzahava twerekeza ku ihema ry’Aburahamu, aho Aburahamu yakiririye ba bamalayika bari bamusuye, tugana I Yerusalemu tuzanyura I Betelehemu kureba aho Yesu yavukiye n’aho abamalayika basanze abungeri igihe inyenyeri yabajyaga imbere ngo bajye kureba aho umucunguzi yavukiye
Tuzarara I Yerusalemu

Day 8
Tuzasura umurima wa Getsemani aho Yesu yasengeraga mbere y’uko baza kumufata, dusure inzu ya Kayafa aho Yesu yagiye gucirwa urubanza akanahafungirwa mbere y’uko ajyanwa kubambwa, nyuma yahoo tuzajya I Golgota, turangirize ku mva ya Yesu
Tuzarara i Yerusalemu

Day 9
Tuzasura umusozi wa Elayoni aho Yesu yari ahagaze igihe yasubiraga mu I juru, dusure umusozi wa Moriya aho Mose yari agiye gutambira Isaka, dusure ahahoze urusengero rwubatswe na Salomo, Dusure aho Dawidi yatuye, tujye ku kidendezi cy’Isilowamu hahandi Yesu yakirije wa muntu yari amaze imyaka myinshi aryamye yarabuze umujugunya mu mazi ngo nawe atabarwe. Tuzava aho ngaho tujya I Tel Aviv gusura Neot Kedumin.
Tuzarara i Yerusalemu

Day 10
Tuzahaguruka I Yerusalemu mu gitondo tujye gusura Qumran aho Yohana Baptista yari atuye, tujye I Masada aho tuzagendera mu kamodoka kagendera ku nsinga ( Cable car), Tujye ku Nyanja y’umunyu ( Dead sea), aho tuzagira umwanya wo koga muri iyo Nyanja, waba uzi koga cyangwa utabizi ubasha kogera muri iyo Nyanja kuko amazi yayo ntabwo atuma urohama ahubwo agushyira hejuru ukareremba, icyondo cyaho kivura indwara zose z’uruhu. Tuzava aho dukomeza kukibuga cy’ Indege Tel Aviv aho tuzajya gufatira indege iducyura.

Agakiza.rw

Umunsi wa 1 wo gusura igihugu cya Isirayeli (Igice cya 1)

Mu rugendo turi gukorera muri Isirayeli uyu munsi twasuye agace ka Galiliya n’inyanja ya Tibeliya twabanje kuri Yorodani:



Abantu bava mu mahanga yose baje kubatiriza kuri Yorodani, abandi baje kuhasengera.

Kuri Yorodani hari inyandiko y’ikinyarwanda

Iyi Yorodani ifite amateka yihariye kuko ariho Abisirayeli bambukiye binjira mu gihugu cy’isezerano, Namani yahakiriye ibibembe, Eliya na Elisa barahambutse, Itandukanya Isirayeli n’abanyamahanga, Yohana niho yakoreye umurimo, Yesu niho yabatirijwe.
Nyuma twakomereje mu Kibaya cya Marie Magadalene aha niho Yesu yakirije Mariya abadayimoni benshi maze nawe amusiga amavuta ahenze Yesu avuga ko icyo akoze aho ubutumwa bwiza buzagera nawe azavurwa kugeza ubu aho yaratuye hubatse Hotel nziza cyane imwitirirwa



Hazamurwa idarapo ry’ Urwanda hakaririmbwa indirimbo yubahiriza igihugu

Urugendo twarukomereje mu nyanja ya Tiberiya aho twafashe umwanya wo kuzenguruka aho Yesu yakoreye ibitangaza turi mu bwato igitangaje n’uko tukihagera bazamuye ibendera ry’ Urwanda tukaririmba indirimbo yubahiriza igihugu, abakozi b’ Imana batuganiriza bimwe mubyo Yesu yakoreye muri iyi nyanja no hafi yayo cyane ko umurimo we yamukoreye i Galilaya imyaka 3 yose.

Nyuma twazamutse umusozi w’ Abahiriwe aho Yesu yigishije amagambo aboneka muri Matayo ibice 5 , twakomeje Tabora aho Yesu yatubuye imigati 5 n’ifi 2, aho niho Yesu yiyeretse intumwa amaze kuzuka basubiye Kuroba ifi.

Iri buye niryo bakoresha nk’urushyo mu kwega Yesu niho yavugiye ngo uzasitaza umwana muto icyamubera cyiza nuko barumuhambirira ku ijosi bakamujugunya mu nyanja


Isinagogo y’iwabo wa petero

Aho itorero ry’ intumwa ryakomotse

Twakomereje urugendo iwabo wa Petero aho ni i kaperinawumu, hakaba hari amateka yihariye kuko twasuye isinagogi Yesu yigishirijemo abayuda.Banze kwakira ubutumwa bwiza ahita atangiza umurimo w’ ivugabutumwa mu nzu kwa Petero. Hari hafi y’iyo Sinagogi nka Metero 6 gusa itorero rya mbere ry’ intumwa rikaba ariho ryavuye aha kandi niho Yesu yabwiriye Petero amagambo akomeye ko ahawe imfunguzo z’ Ubwami bw’ Imana n’inkoni y’ Ubushumba.

Aha Yesu yahatuburiye imigati anahabwirira Petero ko azayobora itorero

Tuzajya tubamenyesha amakuru y’urugendo rwa buri munsi. Turangije tubibutsa ko abifuza gusura iki gihugu hari urundi rugendo ruteganyijwe mu kwezi kwa kane umwaka wa 2017.Ubaye ubyifuza wakwegera ubuyobozi bw’urubuga Agakiza.org bakabigufashamo.

Agakiza.rw

Ku munsi wa 2 wo gusura Isirayeli

Twasuye i Kana ya Galilaya aho Yesu yakoreye igitangaza cya mbere agahindura amazi divayi twabashije kubona ibisigazwa by’ intango 6 bujuje amazi.


Twakomereje urugendo Kumusozi wa Tabora aho Yesu yazamukanye na Petero, Yohana, Yakobo bageze mu mpinga y’ Umusozi Mose na Eliya barababonekera.

Umusozi wa Gilibowa aho Sauli yapfiriye n’abahungu be

Iki n’ikibaya cya Megido

Iyo uri kuri uyu musozi uhita ureba hakurya gato umusozi wa Gilibowa aho Sauli n’ abahungu be bapfiriye munsi gato hari ikibaya cya Megido aricyo kizaberamo intambara ikomeye izarangizwa na Mesiya agarukanye n’ Itorero.


Intangiriro y’Umusozi wa Herumoni ariho hari isoko ya Yorodani

Bimwe mubiranga uyu musozi

Twasuye Kayisaliya ya Firipo iherereye kumupaka wa Rebanoni na Siriya . Aha hari isoko ya Yorodani ni munsi y’umusozi wa Hermoni zaburi 133:3 ivuga ko hari ikime gituruka kuri uwo musozi kikamanukira ku misozi y’I Siyoni.

Niwo musozi muremure muri Isirayeli. Kera abaroma bahatambiraga ibitambo kuko yari kayisariya y’ abapagani. Niho na none Yesu yajyanye abigishwa igihe yababazaga ati mwumva bavuga ko Umwna w’umuntu ari nde? Niho Petero yaherewe amasezerano ko azayobora itorero.



Inzu z’ubuvumo babagamo

Muri iki kibanza niho Yosefu yabarizaga akabona ibyo gutunga umuryango

Urugendo twarukomereje Inazareti iwabo wa Yosefu na Mariya twabashije gusura aho marayika yiyerekeye Mariya amubwira ko azabyara Mesiya aho umuryango wa Yosefu wari utuye iyo uhageze ubona ubuzima babagaho bwa gikene burimo kubaza icyo gihe babaga mu buvumo, ntabwo bari bafite ubushobozi bwo kubaka inzu.
Tuzakomeza kubagezaho uko urugendo rumeze kugeza rurangiye tunabibutsa ko abifuza kuhasura bakwegera ubuyobozi bw’urubuga Agakiza.org bukabibafashamo.

Agakiza.rw

Umunsi wa 3 w’ Urugendo rwo gusura Israel.

1. Umusozi wa Carmel

Umusozi wa Carmel ni umusozi Umuhanuzi Eliya yakoreyeho umurimo ukomeye ku bwishyaka ry’umurimo w’Imana. Igihe cy’Umwami Ahabu abisirayeli barigometse basenga izindi mana, basenga baali imana yazanywe na Yezebeli wari umugore w’umwami Ahabu.

Eliya yaje kugira ishyaka ahagarika imvura imyaka 3 n’igice, igihe kigeze azamukana n’abahanuzi ba baal ku musozi Carmel bumvikana gusenga bakareba Imana y’ukuri iyariyo yaba ari Uwiteka cyangwa Baal. Ayo makuru tuyasanga mu gitabo cya 1 Abami 18:20-39, Eliya yarasenze umuriro uramanuka utwika igitambo bose bamenya ko Uwiteka ariwe Mana, Eliya yafashe ba bahanuzi bose 850 abicisha inkota izina ry’Imana ya Israel rirongera rirubahwa,


Iyi n’ishusho igaragaza icyo Eliya yakoreye aha hantu

Hari igicaniro gishushanya icyo Eliya yubakishije amabuye 12

Aha hafatwa nko mu ihuriro ry’isi iyo uhari ubasha kureba Isirayeli yose

Iyo uri kuri Carmel uba ureba munsi ikibaya cya megido ariho hari akagezi Eliya yiciyeho abahanuzi babali hafi yaho niho umushunemukazi yari atuye.

Iyo uhasuye uhasanga inyubako y’urusengero mu rwego rwo kugira ngo hatibagirana, Muri urwo rusengero bubatsemo igicaniro kigizwe n’amabuye 12. Ni urwibutso rw’igicaniro Eliya yubatse. Hari igishushanyo cy’umuhanuzi Eliya afatiye inkota hejuru y’umuhanuzi wa baal.

Twahavuye dusura kayizariya yo ku nyanja ya Mediterane. Aho iyo uhageze ubona umujyi wasenyutse. Wari umujyi wubatswe na Herode mu buryo bwo kugaragaza gukomera kwe yahubatse stade nini yo gukoreramo ibirori binyuranye.

Mbere yo gutangira gusura mubanza kwerekwa film igaragaza amateka yaranze uyu mujyi

Aya mashusho agaragaza uburyo abakristo bishwe

Iyi stade niyo biciramo abakristo

Aha niho haberaga amasiganwa y’amafarashi n’indi mikino

Herode yakoze piscine nziza ku nyanja ya Mediterane

Iyo stade kandi niyo biciragamo urw’agashinyaguro abakristo. Babahaga inyamaswa zabitojwe zikabashanyaguriza imbere y’imbaga y’abantu benshi babaga buzuye kur’iyo stade bakiyamirira nk’abareba umupira.

Aho ninaho Pawulo yabohewe azira kubwiriza ubutumwa abanyamahanga. Ahakurwa ajyanywe i Roma kuko yari ajuririye kuri Kayizari Ibyakozwe n’intumwa 27;1-44

Hafi yaho Petero yatangirije itorero i Yopa
Twasoreje ahitwa Jaffa bibiriya ihita i Yopa, Aho hari urusengero rwitiriye intumwa Petero. Ngo aho niho Petero yatangirije ivugabutumwa. Aho i Yopa kandi niho Umuhanuzi Yona yamanukanye agiye gutega ubwato bumujyana i Tarushishi ahunga gutumwa n’Imana Yona 1:1-16

Hari hatuye Koruneriyo umwe Malayika yiyeretse ari gusenga Ibyakozwe n’ Intumwa 10 na Tabita nawe yari atuye aho hafi.

Umujyi wa Telaviv muri iki gihe

Ikigaragara n’uko kuri ubu uyu mujyi utuwe n’abanyamahanga benshi Ambassade z’ibihugu byinshi niho ziri, hari iterambere rigaragara gusa ubuzima bw’abantu baho kubaha Imana ni gute cyane bitandukanye cyane n’abatuye i Yerusalemu.

Tuzakomeza kubagezaho uko uru rugendo ruri kugenda kandi abifuza gusura iki gihugu twabibafashamo.

Agakiza.rw

Umunsi wa 4 w’ Uruzinduko muri Isirayeli

Twasuye umusozi wa Elayono:

Uyu musozi ufite amateka menshi, Yesu niho yigishirije abigishwa be gusenga isengesho rya Data wa twese, niho yararaga asenga, niho yanyuze abaturage bishimira kuza kwe baririmba ngo hoziyana hahirwa uje mu izina ry’ Uwiteka, niho yarahagaze bamwereka inyubako y’Urusengero akaririra Yerusalemu, niho yafatiwe avuye gusenga Getsemani ninaho yazamukiye ajya mu ijuru kandi ninaho azanyura agarutse yinjira muri Yerusalemu.

Iyo uri kuri uyu musozi ubona imva z’abakire babayahudi bategerejeko ubwo azagaruka bazazuka bakinjirana mu rusengero i Yerusalemu.

Ubuvumo Yesu yigishirijemo abigishwa isengesho rya Data wa twese

Igiti kiri aho Yesu yakunda gusengera buri gihe

Inkuta zikikije ubu buvumo zanditseho Data wa twese uri mu ijuru mu ndimi nyinshi harimo n’Ikinyarwanda

Abayuda babakire bashingurwa kuri uyu musozi kugirango Yesu niyagaruka bazabe abambere mu kuzuka binjirane i Yerusalemu

Iyo uri kuri Elayono uba witegeye i Yerusalemu neza ubasha kureba ibice byose biyigize

Aha hubatse urusengero niho Yesu yarahagaze aririra Yerusalemu


Aha ni igetsemani aho Yesu yasengeraga iki giti nicyo mu gihe cya Yesu

Iri buye niryo Yesu yasengeyeho i Getsemani

Iyo uhari na none uba reba Yerusalemu ya kera ninshya imbere yawe aha niho ubasha kureba umurwa wa Dawidi, aho Abraham yatambiye Isaka (Moriya) Irembo Yesu azinjiriramo agarutse kwima ingoma n’ibindi byinshi, munsi y’uyu musozi niho hari imva ya Mariya nyina wa Yesu.


Aha niho Simoni yakiriye Yesu umusalaba

Twakomereje urugendo aho banyujije Yesu aboshe bamaze kumufatira i Getsemane. Yari ababaye, Muri iyo nzira y’umusalaba yakoze hari bimwe bigiye biranga aho yanyuze yikoreye umusalaba aha twavuga nk’aho yaguye umusalaba umunanije, aho yabonaniye na Maman we Mariya, aho yahuriye na Simoni wamutwaje umusalaba.
Twasuye urukuta rw’amaganya ahahurirwa n’ amoko menshi y’abantu baturutse kw’isi yose baje gusenga. Aka n’agace kasigaye ku rusengero rwa Salomo rwubatswe hashize imyaka myinshi abantu bavuye mu isi yose baraza bakahasengera uhasanga udupapuro twibyifuzo by’abantu baje gusenga n’utw’ ababatumye.


Urugendo twarukomereje ku mva ya Dawidi. Aho twamenye ko aho ureba imva igaragara utatekereza ko yaba ashyinguwe hafi, ahubwo ashyinguye kuri Metero hafi 30 z’ubujyakuzimu kubera ko umujyi uhari ubu wubakiye hejuru y’ibisigarira by’inyubako za kera. Hafi yaho niho hari icyumba cyo hejuru aho Yesu yasangiriye n’abigishwa ifunguro rye rya nyuma.

Ubusanzwe biragoye ko wasura uyu mujyi ubitse amateka menshi ukurikiranyije ibibanza nkuko Bibiriya ibivuga, bitewe n’uko haba hari abantu benshi barenze ibihumbi 100 bahasura buri munsi.

Ibyo bigasohoza ijambo ry’Ubuhanuzi rivuga ngo Yewe Yerusalemu amarembo yawe ntazugarirwa ku manywa na n’ijoro aha byari bivuze ko bazahorana ababasura buri gihe.

Tuzakomeza kubagezaho amakuru ya bimwe mubibanza bitagatifu bibitse amateka akomeye ya Bibiliya twasuye kandi abifuza bose gusura iki gihugu tubibafashamo kugira ngo buri wese agere ku nzozi ze.

Pastor [email protected] i Yerusalemu

Agakiza.rw

Urugendo rwo gusura Israel umunsi wa 5

Uyu munsi twasuye ihema rya Abraham. Twagiyeyo duhetswe n’ingamiya. Tugezeyo twabonye uko Abraham yajyaga yakira abashyitsi batubwira ko ari umuco w’Abayuda, buri wese yazimaniwe muri iri hema.

Iyo umanuka kw’ihema rya Aburahamu ugenda kungamiya

Iyo muhageze Aburahamu abaha amazi yo gukaraba

Nyuma y’ibiganiro byiza arabazimanira

Abashyitsi bafashe akanya ko gushima Imana no gushimira Aburahamu

Ururwiro twakiranywe rwatumye twifuza ifoto y’Urwibutso

Twakomereje urugendo ahitwa Qumuran bu butayu bwa Yudaya aho niho Yohana umubatiza yabaga n’abigishwa be Matayo 3:1-6 twahabonye bimwe mu bikoresho byari bibitswemo imizingo yaje kuboneka mu mwaka wa 1967 umwe muri iyo mizingo twawubonye. Na Yesu yaje kuhasanga Yohana hamwe n’intumwa ze

Ubutayu bwa Qumuran basanzemo imizingo

Umwe mu mizingo bahatoraguye

Abayuda bahatuye bakora imihango yo kwiyeza

Basangirira hamwe

Twasuye Yeriko tubona umusozi Yesu yasengeyeho ahamara iminsi 40 ageragezwa na Satani Matayo 4:1-11 twabonye ibisigazwa by’inkike z’ i Yeriko zasenyutse mu gihe cya Yosuwa 6;1-20


Uyu musozi niwo Yesu yasengeyeho iminsi 40

Twasuye na none igiti Zakayo yuriye ntabwo ari umuvumu nkuko bakivuga muri Bibiliya y’ikinyarwanda, icyo giti a kirahari kugeza uyu munsi.

Iki nicyo giti Zakayo yiriye kugira ngo arebe Yesu

Twasuye ubutayu bwa Masada ahahoze inyubako y’umwami Herode. Abaroma bamaze gutwika urusengero rw’I Yerusalemu. Ni mu butayu bw’i Yudaya. Abo bashatse kuzana revolution Abaroma barabarwanya babasanga i Masada. Abaroma babarwanirijeyo birabananira bimara imyaka 4 birwanaho nyuma bugarijwe abagera 956 bahitamo kwiyica n’imiryango yabo. Bose barapfuye barashira uwanyuma warusigaye ariyica banga kugwa mu maboko y’abatarakebwe aribo baroma.

Kuzamuka Masada nukugenda mutumodoka twabigenewe tugenda mu kirere

Ikibaya cya sodomu na Gomora kiri ku birometero 25 uvuye i Masada ikibaya gifite amateka mabi abahatuye bakoze ibyangwa n’ Imana kugeza ubwo Imana ifata icyemezo cyo kuharimbura Itangiriro 14:3, 19:26. Munsi y’uwo musozi w’i Masada hari inyanja ipfuye hakurya niho hari umusozi wa Mowabu hakaba hatuwe n’abanyemowabu bakomoka ku bana Loti yabyaranye n’abakobwa be. Ariko aha Imowabu na none hakomotse umukobwa yabaye intwari muri Isirayeli yitwa Rusi.

Twasuye na none inyanja y’umunyu uwaratuyoboye yatubwiye ko iyi nyanja ifite amateka afite icyo yatwigisha nk’abakristo, Ubusanzwe Yorodani yisuka mu nyanja ya Galilaya uwo mugezi ugakomeza utembera mu nyanja ipfuye hamwe n’indi migezi myinshi n’amazi akomoka mu misozi ikikije iyi nyanja ipfuye byose byisukamo ariko yo ntaho isuka byose irabigumana ibyo bigerageranywa n’umukristo udatanga ahora yakira gusa.

Inyanja ipfuye

Mu gihe cy’Abaroma, muri aka gace abakozi bahembwaga umunyu wacukuwe muri iyo nyanja niho hakomoka ijambo salaire (sel), na none abasirikare nabo babahembaga umunyu niho hava ijambo soldat( solt)
Turakomeza kubakurikiranira amakuru y’impamo kandi tuzayabagezaho uko yakabaye, Niba wifuza gusura iki gihugu watwegera tukabigufashamo.
Pastor [email protected] mu butayu bwa Yudaya

Agakiza.rw

Umunsi wa 6 w’Uruzinduko muri Israel

Kuri uyu munsi wa 6 wo gusura igihugu cya Israel ariko akaba ari umunsi wa 7 kuva tuhageze twasuye imva ya Yesu, n’ahantu umukristo wese afitiye amatsiko yo gusura cyane ko niyo wabanje gusura ibindi bice ukaba utaragera muri iyi mva uba wumva umutima udatuje.

I saa yine n’igice twari tuhageze tuvuye mu butayu bwa Yudaya aho twari twaraye mu mudugudu w’Abayuda, tukihagera twakiriwe n’Umwe mubashinzwe gufasha abaje gusura imva ya Yesu, n’umusaza ukomoka muri Suede ubona afite ubuntu bw’ Imana cyane ko yaduhaye ubuhamya bw’icyo Yesu yakoze mu buzima bwe.



Ifoto igaragaza umusozi wa gologota neza yafashwe 1800

Yatangiye adusobanurira uko kuri uyu musozi wa Golgota ariho Yesu yababwe akaba yarashyinguwe hafi yawo, cyane ko hari ibimenyetso bibigaragaza aha ni mu murima wa Simoni umu Alimatayo umwe wagiye gusaba umurambo wa Yesu ngo awushyingure.

Aho bengera Vino hakaba hari n’iriba

Yari umukire cyane. Harimo Iriba ry’amazi, aho bengeraga inzabibu, uwo musozi ufite ishusho imeze nk’ igihanga cy’Umuntu, ikindi nuko ari ku nzira imanuka iva i Yerusalemu, ikindi nuko bahamya ko ariho abaroma baciraga abantu urupfu rubi rwo guterwa amabuye bagahamya ko ari naho na Stefano bamutereye amabuye.

Ni ukuri imva ya Yesu irarangaye yarazutse

Yarazutse
Nyuma yo gusura ibimenyetso bigaragaza urupfu rwa Yesu twabashije kwinjira mumva ya Yesu nubwo biba ari akanya gato kuyinjiramo bitewe n’ubwinshi bwahasura uhita wibuka icyo urupfu rwa Yesu rwakoze mu buzima bwacu.

Twakoze igaburo ryera

Twasoje dukora igaburo ryera ibi bikaba ari umuco wa buri bantu baje gusura iyi mva ya Yesu ikindi n’uko uhahurira n’abantu bavuye mu bihugu byose byo ku isi, baririmba indirimbo zitandukanye, abandi baba bahari bicaye basoma ijambo ry’ Imana.

Igikombe bitwa Gehinomu

Tuhavuye twabonye igikombe cyitwa Bene Hinomu ariho Bibiliya yita Gehinomu aha hatambirwa ibitambo by’abana bigakorwa n’abanyamahanga bafite iyi mico mibi yo gutamba ibitambo by’abantu batambiraga ikigirwamana cyitwaga moleki.

Ubu buvumo nibwo Abungeri babagamo

Twasuye Beterehemu. Twatangiriye aho Malayika yiyerekeye abashumba b’ intama igihe bari baraririye umukumbi nijoro akabazanira inkuru nziza y’ivuka rya Yesu Kristo. Urebye ubuvumo babagamo bugaragaza ukuri kw’ibyabaye kuko kugeza iki gihe winjiyemo ubona ko bwari ubuvumo bajyaga bacanamo. Hejuru hagaragaza umukara w’ahantu hajyaga hacanwamo umuriro,

Aha hari inyenyeri niho Yesu yavukiye

Aha niho umuvure winka bashizemo uruhinja wari uri

Aya makuru nimpamo
Twasuye kandi aho Yesu yavukiye. Twabonye ubuvumo yavukiyemo n’ahari hari umuvure bamuryamishijemo cyane ko bibiliya igaragaza neza ko abantu bimye icumbi Mariya na Yosefu bigatuma avukira mu muvure w’inka.


Iyi ifatwa nka Jenoside yakorewe aba bana bazira kuvuka kwa Yesu

Ubuvumo burimo ibisigazwa by’abana b’abahungu Herode yishe ashakisha Yesu
Ikibabaje kuruta ibindi twasuye urwibutso rw’ abana bishwe na Herode amaze kumva ko havutse Umwami . Yishe abana b’abahungu kuva ku myaka 2 kugira ngo na Yesu nawe apfemo. Ubona biteye umubabaro ibi bigaragaza ko ibyo Bibiliya ivuga ari ukuri.
Ikindi ibyabereye aha byemezwa n’isi yose cyane ko INESCO ifata aha hantu nk’inzu ndangamurage kuko kuva mu kinyejana cya 3 hari ibimenyetso bitigeze bihinduka na rimwe.

Agakiza.org turakomeza kubakurikiranira uru rugendo kandi tubamenyesha ko abifuza gusura igihugu tubibafashamo baba abashaka kwiga ubuvuzi buteye imbere, ubuhinzi, abanyepolitike, abacuruzi aba bose bakora amahugurwa y’iminsi 15 muri Israel bagahura n’inzobere zo muri iki gihugu. Abifuza kujya gusenga bo bakora urugendo rw’ iminsi 10 kandi bagataha bafite umugisha w’ Imana.

Pastor [email protected] i Yerusalemu

Agakiza.rw

Ku munsi wa 7 wo gusura igihugu cya Israel

Uyu munsi twasuye imva ya Rachel uyu niwe Maman wa Yosefu uwo Yakobo yakoreye imyaka 14 agapfira mu nzira bari kujya Heburoni ubwo yavaga kwa Raban nyirarume yakoreye imyaka 20. Aha hantu hafatwa nk’ikibanza gitagatifu kuko hari isinagogi hakaba hari abanyamasengesho b’Abayuda basenga igihe cyose batagira akandi kazi bakora.


Imva ya Rachel umugore wa Yakobo

Umutwaro ukomeye bafite nukuzongera kubaka urusengero rw’ Imana. Kubona abanyamahanga bahaje barishima. Mu magambo ye umwe mu ba Rabi bakomeye yagize ati: Kubabona muje iwacu bitwereka ko mudukunda. Mudufashe gusenga kugira ngo tuzongere kubaka inzu y’ Imana kandi Imana ya Israel izabahe umugisha mushyigikire iki gikorwa cyo kongera kubaka inzu y’ Imana i Yerusalemu.
Twakomereje urugendo rwacu kuri Jardin Biblique ( ahateye ibiti byinshi bivugwa muri Bibiliya)

Kuko Uwiteka Imana yawe ikujyana mu gihugu cyiza, kirimo imigezi n’amasōko n’ibidendezi birebire, bitembera bidudubiriza mu bikombe no ku misozi. Ni igihugu cy’ingano na sayiri, n’imizabibu n’imitini n’amakomamanga, ni igihugu cy’imyelayo n’ubuki, ni igihugu uzariramo ibyokurya ntibibure, ntuzagire icyo ugikeneramo. Ni igihugu cy’amabuye y’ibyuma, n’icy’imisozi wacukuramo imiringa. Uzarya uhage, uzashimira Uwiteka Imana yawe igihugu cyiza yaguhaye. (Gutegeka kwa kabiri 8:7-10)

Ibiti twabonye:
1. Igiti cya Elayo


Imvuto z’Igiti cya Elayo

Iri n’itara muyo bakoresha kera
Imbuto zacyo zivamo amavuta. Amavuta ya Elayo yakoreshwaga mu kwimika abami abatambyi n’abahanuzi, bayomoza ibikomere, barayarya, yakiza indwara nk’ababembe, yinjiza amafranga menshi, bayacana mu itara, akoreshwa munzu y’ Imana. Twabonye uburyo bwa gakondo bwo gukamura amavuta, kandi yakamurwaga mu buryo butandukanye bitewe naho azakoreshwa. Ayo gukoresha mu nzu y’Imana ntiyakamurwaga nkandi yose yo yabaga afite umwihariko wayo.

2. Zizifu Spina Christi

Twabonye kandi igiti bakozemo ikamba ry’amahwa bambitse Yesu bikaba bihuye n’ umugani w’ibiti wanditse mubacamanza 8 muri Bibiliya y’Ikinyarwanda bacyise umufatangwe ariko ubusanzwe cyitwa zizifu spina Christi. Iki giti nicyo bahisemo gukoramo ikamba ryo kwambika Yesu. Gifite amahwa. Hari mu rwego rwo gutuka Yesu ko abemera ubwami bwe bazatikwa nkuko abimeleki yagenje. Tubisanga mu gitabo cy’abacamanza igice cya munani n’icya cyenda.

3. Datier

Twasuye kandi ibiti bivamo ubuki bijya gusa n’imikindo. Ubuki buvugwa ntabwo ari ubuki bw’ inzuki ahubwo buva mu mbuto z’ ibyo biti. Uwabitweretse yakomeje atubwira ko igihugu cya Isirayeli kibona imvura iminsi itageze kuri 30 mu mwaka wose . Yesu kuba yaravuze ngo abafite inyota mwese nimuze munywe ku buntu, yabivuze umunsi wanyuma w’iminsi mikuru ’ingando. Haba hashize amezi 8 nta mvura igwa. Birumvikana ko yabaga avuze ikintu cyabaga ari ikibazo bafite muri ako kanya. Biba bikomeye, Ariko Imana igakomeza ikabatungira mu butayu.

Ezobu

Ezobu bayikoresha mukwiyeza, ivura indwara nyinshi, bayikoresha nk’ikirungo cyibyo kurya.

Iri jambo riri mumagambo akomeye bambara ku ntoki mu gahanga iyo bagiye gusenga, ndetse no ku nkomanizo z’imiryango: Nimugira umwete wo kumvira amategeko yanjye mbategeka uyu munsi, ngo mukunde Uwiteka Imana yanyu, muyikoreshereze imitima yanyu yose n’ubugingo bwanyu bwose, nzavubira igihugu cyanyu imvura mu bihe bikwiriye, imvura y’umuhindo n’iy’itumba, kugira ngo musarure imyaka yanyu y’impeke, na vino yanyu n’amavuta ya elayo yanyu. (Gutegeka kwa kabiri 11:13-14)

Uburyo bwo gutunganya ingano zikiva mu murima kugeza bakoze umugati.

Twabonye bimwe mu bikoresho bya gakondo byakoreshwaga mu gusekura ingano, , kugosora, gusya n’ibindi aha niho abahanuzi bahereye bavuga ko azagosora ingano umurama utumuke. Bifashishaga ingero zifatika ziba mu buzima bwabo bwa buri munsi.

Twabamenyesha ko iki gihugu kibitse ubwiru bw’ibyo Imana yakoze kuva kera kugisura biba ari umugisha biguhesha kumenya ijambo ry’ Imana mu buryo bwimbitse uwakwifuza kukigeramo twabimufashamo.

Pastor [email protected] i Yerusalemu

Agakiza.rw

kubera iki tugomba kumenya byimbitse igihugu cya isirayeli ?

Umuntu ntabasha kubaho adafite izindi mbaraga yiringira kugira ngo zimugeze kubyo atabasha : Niyo mpamvu amoko atari amwe yo mu bihugu bitari bimwe usanga bafite izindi mbaraga biringira kandi bizera ko zibafasha kugera ku bidasanzwe.

Kw’isi hose igihugu cya Isirayeli nicyo cyagaragaye gifite Imana isumba izindi mana. Igitabo cyitwa Bibiriya kitwereka amateka y’Imana yitwa Uwiteka kandi kikanatwereka ububasha Uwiteka afite. Bibiriya itwereka ukuntu Uwiteka ariwe waremye ijuru n’isi na ndetse niwe waremye umuntu. Ibihugu bitandukanye byizera Imana ya Isirayeli ariyo Uwiteka ibindi byanze Uwiteka byifitiye ibindi byizera nk’imana.

Twebwe rero tuvuga Uwiteka niyo Mana twizera. Kuko ariyo Mana y’ ukuri. Impamvu rero tuvuga ku gihugu cya Isirayeli nuko dufite Imana ya Isirayeli: nayo ubwayo yivuga ko ari Imana ya Isirayeli.(Kuva 4: 22)

Tugiye rero kuzarebera hamwe iki gihugu ni ikihe? Imana yakivuzeho iki? Mbese giteye gite?

Iyo usomye Bibiriya ubona Imana imaze kurema umuntu yaramuhaye aho kuba. Kubana nawe yarabyifuje ariko satani abicamo. Iyo usomye uko Imana yagiye igoragoza umubano wayo n’umuntu usanga harageraga igihe ikabarimbura. Urugero ni mu gihe cya Nowa ndetse no mu gihe cya Roti ( Itang. 7:23, Itang.19:24)

Igihe cyarageze Imana ihitamo kurobanura umugabo witwa ABURAHAMU imuvanye muri Uri y’abakaludaya imujyana ahantu yamubwiye ko izamwereka.( Itang. 12:1) Agezeyo yamubwiye ko ihamuhaye n’urubyaro rwe kugeza imyaka ibihumbi. Aho niho habyaye kiriya gihugu cyitwa Isirayeli. Ikihagaragaza ni ingabano z’inzuzi Imana yamubwiye ( Itang.15:18) Uyu mugabo Aburahamu Imana yari yamukundiye ko yanze kwizera ibigirwamana ahubwo akayizera.

Reka turebe uko bibiriya ibivuga.

- Itangiriro 17:8 “ Kandi wowe n’urubyaro rwawe ruzakurikiraho, nzabaha igihugu cy’ubusuhuke bwawe, igihugu cy’I Kanani cyose kuba gakondo y’iteka nanjye nzaba Imana yabo.”
- Itangiriro13:15:” Igihugu cyose ubonye ni wowe nzagiha n’urubyaro rwawe iteka ryose.”
Imana yakomeje kuganiriza abakomoka kuri Aburahamu. Dore uko yabwiye Yakobo:
- Itangiriro35:12 “Kandi igihugu nahaye Aburahamu na Isaka nzakiguha nawe, n’urubyaro rwawe ruzakurikiraho nzarugiha”

Mu gihe bari mu buretwa muri Egiputa Imana yakomeje isezerano iteganya kubasubiza igihugu cyabo:

- Kuva 6:4 Kandi nakomeje isezerano ryanjye nabo, ko nzabaha igihugu cy’I Kanani, igihugu cy’ubusuhuke bwabo basuhukiyemo (aha nukwibuka ko Aburahamu yaje ari umusuhuke avuye muri Uri y’abakaludaya)
- Kuva 13:5 Kandi Uwiteka nakujyana mu gihugu cy’Abanyakanani, n’Abaheti, n’Abamori, n’Abahivi n’Abayebusi icyo yarahiriye ba sekuruza bawe ko azakiguha, igihugu cy’amata n’ubuki,….”
- Abalewi 25: 38 Ndi Uwiteka Imana yanyu, yabakuriye mu gihugu cya Egiputa kubaha igihugu cy’I Kanani, nkababera Imana.
Uwiteka kandi yagaragaje ko I Yerusalemu ari umurwa yihitiyemo ko umubera ubuturo.

Bibiriya ibivugaho iki?

- Zaburi 132: 13 Kuko Uwiteka yatoranije Siyoni, yahashakiye kuba ubuturo bwe. (Siyoni ni umusozi uri I Yerusalemu niwo Salomo yubatseho urusengero)
- Yesaya 33:20 “…amaso yawe azareba I Yerusalemu usange ari ubuturo bw’amahoro n’ihema ritazasimburwa,…”
- 2 Abami 21:4 Yubaka ibicaniro mu nzu y’Uwiteka yari yaravuzeho ati: “ I Yerusalemu niho nzashyira izina ryanjye.”

Imana yohereje umwana wayo Yesu avukira ahantu hitwa I Beterehemu mu muryango wa Yuda. Ni mu gihugu cya Isirayeli. (Yesaya 11:1, Mika 5:1, Matayo 2:6)
Ubwami bw’ imyaka igihumbi bw’umwana w’Imana buzagira icyicaro I Yerusalemu (Ibyahishuwe 14:1-4)

Muri make ngibyo ibituma byaba byiza kumenya iki gihugu. Kumenya amateka yacyo nuko giteye. Icyo nicyo gituma dushaka kumenya byimbitse iby’ icyo gihugu.
Tuzakomeza tuvuga ku bice bitandukanye by’icyo gihugu bizadufasha kumenya neza Imana ya Isirayeli.

Umwanditsi
[email protected]

Agakiza.rw

Umusozi wa Elayono ni musozi ki ?

Umusozi wa Elayono ni umusozi uba mu gihugu cya Isirayeli. Ni umusozi ufite amateka menshi mu buzima bw’aba Kristo. Niwo Yesu azakandagiraho agarutse aje kwima ingoma y’imyaka 1000 ari kumwe n’itorero. Uyu musozi uteganye n’umusozi wa Siyoni ariwo Salomo yubatseho urusengero niwo Yerusalemu. Uyu musozi uba i burasirazuba bwa Jerusalem. Ufite ubutumburuke bwa metero 815.

Kubera iki witwa umusozi wa Elayono? Ni ukubera ko mu gihe cya Yesu uyu musozi wari uteyeho ibiti bya Elayo. Amavuta yavaga muri izo mbuto za Elayo yabaga agenewe kwimika abami n’abatambyi bakuru.

Uyu musozi ufite amateka menshi.

1. Aha niho Dawidi yatereye ahunga abusalomu. 2 samweli 15: 30.” Dawidi aterera aho bazamukira ku musozi wa Elayono agenda arira ikijyaruguru, yari atwikiriye umutwe adakwese, kandi nabari kumwe na we bose bitwikira imitwe bazamuka barira ikijyaruguru”
Umwami Salomo yari yarubakiye ibigirwamana by’abagore be kuri uwo musozi:
1Abami 11:7, Bukeye Salomo yubakira Kemoshi ingoro ku musozi werekeye I Yerusalemu…

2. 2 Abami 23:13, Kandi ingoro zari ziteganye n’I Yerusalemu zari I buryo bw’umusozi w’ I rimbukiro, izo umwami Salomo yubakiye Ashitaroti ikizira cy’abasidoni, na Kemoshi ikizira cy’abamoabu, na Milikomu ikizira cy’abamoni,….

Uyu musozi kandi kubera ubuhanuzi buri muri zakariya 14:4 , guhera mu kinyejana cya 10 mbere ya Kristo Abayuda bahisemo kuhashyira irimbi. Ubwo buhanuzi bugira buti: “ Uwo munsi azashinga ibirenge bye ku musozi wa Elayono, werekeye I Yerusalemu I Burasirazuba. Uwo musozi wa Elayono uzasadukamo kabiri uhereye I burasirazuba ugeze iburasirazuba. Uzacikamo igikombe kinini cyane, igice cy’umusozi kimwe kizashinguka kijye Ikasikazi, ikindi kizajya ikusi.
Kubera ubu buhanuzi bahisemo kuhashyira irimbi mu rwego rwo kugira ngo Mesiya ubwo azaza akahashinga ibirenge bazahereko bazuke. Hari imva zirenga 70,000.


Imva z’abayuda ziri kuri uyu musozi. Mesiya naza bizera ko bazaherako bakazuka.

Ibindi bikorwa byahabereye :

Kuri uyu musozi kandi niho Yesu yakundaga gusengera. Luka 21 : 37, Iminsi yose yirirwaga mu rusengero yigisha, ariko bwakwira agasohoka akarara ku musozi witwa Elayono.

Igihe bari bari ku musozi wa Elayono nibwo Yesu yigishije intumwa gusenga Dawe uri mw’ijuru.


Aha niho bari bicaye abigisha gusenga. Ni ku musozi wa Elayono.

Yesu ari ku musozi wa Elayono nibwo yahanuye gusenyuka kwa Yerusalemu : Mariko 13 : 3, Yicaye ku musozi wa Elayono, yerekeye urusengero….
Abantu baramuhimbaje uhereye igihe yendaga kugera mw’i banga ry’umusozi wa Elayono, Luka 19 :37-42, Yenda kugera mwibanga ry’umusozi wa Elayono, iteraniro rinini ry’abigishwa be bose batangira kunezerwa … ageze hafi abona umurwa arawuririra ati : « Uyu munsi nawe iyo umenya ibyaguhesha amahoro,ariko noneho bihishwe amaso yawe
Getsemane iri kuri uwo musozi hasi aho utangirira.


Bimwe muri ibyo biti n’ibyo mu gihe cya YESU.

Kuri uyu musozi kandi niho Yesu yatandukaniye n’intumwa ajya mw’ijuru. Ibyakozwe 1 :12, Basubira i Yerusalemu bavuye ku musozi witwa Elayono, ….

Aba Isiramu kuko bemera Yesu nk’umuhanuzi ntabwo bemera ko yapfuye ahubwo bemera ko yazamutse mwijuru adapfuye nkuko tubisanga muri Quran sourate 4, 157-158. Kubwibyo bubatse umusigiti ku musozi Elayono ahantu hari ikimenyetso cy’ikirenge basobanura ko ari ikirenge cya YESU aho yari ahagaze igihe yazamukaga ajya mw’ijuru.

Winjiye imbere ubonamo aho hantu yari akandagiye. Iyo nyubako nayo iri kuri uyu musozi wa Elayono. Ni umusigiti. Yesu ni ikimenyetso kigibwaho impaka nkuko Bibiriya ibivuga koko.

Udukurikire mu nkuru y’ubutaha tuzavuga ku wundi musozi. Yesu abahe umugisha.

[email protected]

Agakiza.rw

Isirayeli: Menya amateka y’ Umusozi Shilo

Mu mwaka wa 369 mbere ya Kristo, Shilo niwo wari umurwa mukuru wa Israel. Yosuwa 18: 1-3, 1 Samuel 1-3,9-19,24-27. 1 Samuel 4:3-4,12

Uyu murwa ugaragara cyane muri bibiriya mu bitabo bitandukanye nka Yosuwa, zaburi, igitabo cya mbere cya Samweli,’igitabo cy’abacamanza, Yesaya, Yeremiya n’ibindi. Shilo iherereye ahagana mu majyaruguru y’i Beteli. Shilo iherereye mu misozi miremire ya Efurayimu ( Abacamanza 21:19).

Abisirayeli bamaze kwambuka Yorodani bashinze amahema i Girugali. Aho bimukiye bwa 2 bageze muri icyo gihugu cy’I sezerano ni I Shilo (Yosuwa 18:1). Aho niho abatoranijwe bahagurukaga bakazenguruka igihugu bagenda bagabanyiriza imiryango ubutaka bwa buri umwe umwe (Yosuwa 18:8). Baragendaga bagataha I Shilo. Kandi niho hari isanduka y’Uwiteka kuko Yosuwa niho yari atuye, yakomokaga mu muryango w’aba Ephraim kandi nibo bari bahawe ako gace
Yosuwa 18:9

Abo bantu baragenda bagenda icyo gihugu bandika imigabane yacyo mu gitabo uko ari irindwi, bashyiraho n’imidugudu yaho. Maze basubirayo basanga Yosuwa mu ngerero z’I Shilo.

Ibintu bidasanzwe byahabereye:

1.Ishyingirwa ry’aba Benyamini.

Kubera ikibazo cy’intambara yabaye hagati y’aba Benyamini n’abisirayeli (Abacambanza 19, 21), byagaragaye ko aba benyamini bapfuye bagashira, abisirayeli bagira ikibazo ko umuryango umwe mu miryango cumi n’ibiri ugiye kuzima. Bize uburyo bwo kubashakira abakobwa b’I sugi bakababashyingira kugira ngo uwo muryango utazazima. Byabereye I Shilo Abacamanza 21: 12

Bageze I Yabeshi y’I Galeyadi, mu bahatuye basangamo abakobwa b’ isugi Magana ane, babazana mu nkambi y’I Shilo mu gihugu cy’I Kanani (Bibiriya Ijambo ry’Imana)
Abo bakobwa babaye bake biga ubundi bwenge bwo gufata abakobwa b’I Shilo bagiye mu minsi mikuru y’ ingando . Abacamanza 21: 20-21

Nuko babwira abo ba Benyamini bati:” Muzagende mwihishe mu nzabibu maze nimubona abakobwa b’I Shilo basohotse bajya kubyina, muzave muri iyo mizabibu buri wese yifatire umugore muri abo…” impamvu yo kubafata nta yindi nuko bari barahiye ko batazabashyingira kubera umujinya bari babagiriye babirahira mu rwego rwo kubahana. Babuze uko babigenza banga kurenga ku ndahiro ahubwo bakoresha ubwo buryo bwo kubareka bagafata.


Umurima w’imizabibu

2. Inkuru ya Hana.
Hana ni umugore wagize ikibazo cyo gutinda kubyara ni inkuru iri mu gitabo cya 1 Samweli1. Yajyaga ajya I Shilo gusenga ari naho yahuriye n’umutambyi Eli amushinja ubusinzi abonye ari gusenga akubitagura iminwa ( 1 Samweli 1: 9-17).
Igihe cyarageze Hana arabyara uwo mwana amwita Samweli amaze kumucutsa amushyira umutambyi. Byabereye I Shilo.


Umutambyi Eli yakiriye Samweli I Shilo.(1Samweli 1:24)
Uwo Samweli yabaye umuhanuzi anasimbura Eli ku butambyi bukuru.

3. Eli umutabyi mukuru yanyazwe isanduku y’Uwiteka bimuviramo urupfu.

Abisirayeli barwanye n’abafilisitiya babonye bagiye gutsindwa bati tujye kuzana isanduka y’Uwiteka iri I Shilo (1 Samweli 4:3.) tuyizane hano mu rugerero (1 Samweli 4:4). Abisirayeli baratsinzwe, abafilisitiya banyaga isanduka y’Uwiteka barayitahana. Nibwo bayiraje mu ngoro ya Dagoni ikigirwamana cy’aba firisitiya kikajanjagurika. ( 1 Samweli 5:4)
Eli yumvise ko isanduka yanyazwe ahubuka ku ntebe aragwa akuba ijosi arapfa.(1 Samweli 4:18)


Igishushanyo cy’uko bari batuye naho ihema ry’ibonaniro ryari riri


Abantu bahasuye babanza kujya muri iyi nzu bagasobanurirwa ibyahabereye hifashishijwe Film.

Amakuru yuwo murwa ni ayo. Ubutaha tuzakomeza n’undi musozi

Adda @agakiza.org

Agakiza.rw

Tumenye Umusozi witwa Gilugali Ev. Adda

Abantu bazamuka bava muri Yorodani ku munsi wa cumi w’ukwezi kwa mbere, bagandika i Gilugali mu rugabano rw ‘i Yeriko mu ruhande rw’i Burasirazuba.Ya mabuye cumi n’abiri bakuye muri Yorodani Yosuwa ayashinga i Gilugali. (Yosuwa 4 :19 -20)
Uwiteka abwira Yosuwa ati : « None mbakuyeho igisuzuguriro abanyegiputa babasuzuguraga. » Nicyo gituma aho hantu hitwa Gilugali na bugingo n’ubu. Nuko abisirayeli babamba amahema i Gilugali, baziririza Pasika ku munsi wa cumi n’ine w’ukwezi nimugoroba, mu kibaya cy’i Yeriko. (Yosuwa 5 :9)

I gilugali ifoto yafashwe n’indege. Ushishoje neza urabonamo ishusho y’urukweto rwa sandale. Kiriya ni ikirenge. Gisobanura ikirenge cy’ubwoko bukomeye. Kandi bisobanura ngo aho muzagera hose ndahabaye. Ni ugukandagira k’ubwoko budasanzwe.

I GILUGALI niho abisirayeli babambye amahema bwa mbere bamaze kwambuka Yorodani. Aha niho Imana yababwiriye ko ibakuyeho igisuzuguriro. Aha niho Kalebu yibukirije Yosuwa icyo Imana yabavuzeho bakiri mu butayu Bw’I Kadeshi barineya (Yosuwa 14:6)

I Gilugali niho Uwiteka yabwiye abisirayeli gukeba abantu bose bavukiye mu butayu (Yosuwa 5:2-8) kuko urugendo rutatumaga babasha gukora icyo gikorwa.
I Gilugali niho Yosuwa yagiranye isezerano n’ abantu bitwa aba Gibeyoni bamwiyoberanijeho bamubeshye ko baturutse kure kandi ari abaturanyi. Yemeye gusinyana nabo amasezerano y’amahoro ntibabarimbura (Yosuwa 9). Bamaze kumenya ko ari abaturanyi byarababaje cyane babahindura abasyi n’abavomyi babo.

Abisirayeli barwanye n’abami 5: Adoniseki umwami wa Yerusalmu, Hokamu umwami w’I heburoni, Piramu umwami w’I Yaramuti, Yafiya umwami w’I Lakishi na Debira umwami wa Eguloni. Aba bami bari bamaze kumva amakuru y’abisirayeli ndetse ko bagiranye amasezerano n’abagibiyoni bwari ubwoko bukomeye cyane. Aba bami bishyira hamwe ngo Batere abagibiyoni. Abagibiyoni bahamagara Yosuwa ngo aze abatabare. (Yosuwa 10). Yosuwa yatabaye aturutse I Gilugali. Niho yabwiye izuba ngo “Zuba hagarara kuri Gibeyoni”. Imana yohereje amabuye avuye mw’ijuru, agwira abanzi b’abisirayeli barapfa barashira. Josuwa n’ingabo ze batabarutse basubira I Gilugali.

Iyo abantu bahasuye banezererwa Imana bakibuka ibyahabereye bagasaba bishingikirije kw’ijambo ry’imana. Aha, benshi basaba gukurwaho igisuzuguriro nkuko Imana yabwiye Yosuwa iti none mbakuyeho igisuzuguriro abanyegiputa babasuzuguraga.

Igihugu cya Israel ni igihugu gifite amateka atureba cyane kubera ko ariho hari amateka y’Imana dusenga yitwa Uwiteka.

Tuzakomeza kuvuga ibice bitandukanye by’icyo gihugu bitwereka amateka y’abisirayeli ndetse turusheho gusobanukirwa gukomera kw’Imana yacu.

Ev. [email protected] agakiza.org

Agakiza.rw

Amateka ya Yerusalem n’uko yabaye umurwa mukuru wa Isiraheli (igice cya 1)

Yerushalayim (יְרוּשָׁלַיִם) bisobanura "Umurage cyangwa Umurwa w’Amahoro" mu Giheburayo mu Cyarabu, Urshalim-al-quds (أورشليم القدس) cyangwa Yerusalemu mu Kinyarwanda; umurwa amadini ya Abayahudi, Abayislamu ndetse n’Abakristu wemera ko ari Uwera

Yerusalemu niwo murwa wonyine ku Isi utuwe n’abantu bavuga ko bemera Imana imwe mu madini atatu (3) atandukanye. Yerusalemu niwo mujyi utuwe cyane kurusha iyindi yose muri Isirayeli, ituwe n’801,000 bagizwe n’amadini atatu; Idini rya Kiyahudi rize na 68%, Abayisilamu 30%, n’Abakristu 2%. (Nabo babakatolike)

Wifashishije TANAKH (Bibiliya yo mu Giheburayo) cyangwa ISEZERANO RYA KERA muri Bibiliya ya Gikiristu, amateka agaragaza ko igihugu cya Isiraheri cyabanje kwitwa Kanani, hanyuma cyaje gusenyuka mu mwaka wa 70 nyuma y’ivuka rya Yesu Kristu ubwo Abaroma bateraga Yerusamu bakayisenya, nyuma kandi mu mwaka w’135 abaturage bose baje kwirukanwa, bahatirwa guhunga igihugu cyabo.

Abo bantu bakomeje kwitwa Aba Isiraheri, ariko baje no kwitwa Abayuda nyuma yo kucikamo ibice kw’Imiryango ya bene Yakobo ku ngoma y’Umwami Yeroboamu wari uyoboye igice cy’Amajyaruguru cyari kigizwe n’Imiryango 9 ya bene Yakobo, yamaze imyaka 22 ku ngoma. Igice cy’Amajyepfo cyari gisigaranye imiryango 3 nicyo cyasigaranye izina ry’Abayuda, cyari kiyobowe n’Umwami Rehoboamu. (1Abami 11).
Yerusalemu yabaye umurwa mukuru wa Isirayeli kuva ryari?

Amateka ya Bibiliya mu Isezerano rya Kera, agaragaza ko Yerusalemu yabaye umurwa mukuru wa Israel kuva ku ngoma y’Umwami Dawidi mu myaka irengaho 3000 ishize.

Umwami Dawidi niwe wimuye Umurwa mukuru awuvana i Hebron awujyana i Yerusaremu.

1 Abami 2: 11 "Kandi imyaka Dawidi yamaze ku ngoma ategeka Abisirayeli yari mirongo ine, kuko yamaze imyaka irindwi ategeka i Heburoni, akamara n’indi mirongo itatu n’itatu i Yerusalemu"

Kuva icyo gihe nibwo Yerusalemu yabaye umurwa mukuru w’igihugu cya Israel.
Ntimuzacikwe n’Igice gikurikira.

BIZIMA [email protected]

Agakiza.rw

Amateka ya Yerusalem n’uko yabaye umurwa mukuru wa Isiraheli (Igice cya 2)

Nyuma y’igice cya 1 twabagejejeho ubushize, uyu munsi turakomerezaho, turebere hamwe uko Yerusalemu ndetse na Israer byaje gusibangana ku ikarita y’Isi hakavuka Palestine.

Yerusalemu yakomeje kuba igicumbi n’umurwa mukuru w’igihugu cy’Abayuda ndetse n’imyizerere yabo, kuva ku gihe cy’Umwami Dawidi mu gihe kingana n’imyaka 400, kugeza ubwo Ubwami bwa Israel bwatsindwaga n’ubwami bw’i Babuloni, bumwe mu bwami bwakomeye mu kibaya cya Mesopotamiya, Ubu ni muri Iraq.

Aba israel bavuye mu buhungiro i Babuloni, mu mwaka wa 538 mbere y’ivuka rya Yesu, Yerusalemu yakomeje kuba Umurwa mukuru w’Igihugu cy’Abayuda.
Isenywa rya Yerusalemu no gusibangana kw’igihugu cya Israel ku ikarita y’Isi hakavuka Palestine.

Umwaka wa 70 nyuma y’ivuka cya Kristo, Ufatwa nk’iherezo rya Israel ya mbere. Ariko dusubiye inyuma, haje kubaho gutandukana kw’imiryango ikomoka kuri bene Yakobo, imiryango 9 ijya mu majaruguru ndetse igumana izina rya Israel, hanyuma iyo mu majyepfo 3 igumana izina ry’Ubwami bw’Abayuda.

Impande zombi zaje gutsindwa intambara bituma mu mwaka 587 mbere ya Kristu nta gihugu kigenga cyongeye kubaho, ibice bimwe byari biyobowe n’Ubugereki bwa kera, Babuloni, n’ubwami bw’Abaperesi, kugeza mu mwana wa 140 mbere ya Yesu, nibwo Israel yongeye kugira igihugu cyigenga nyuma yo kwiganzura Abagereki, kugeza mu mwaka wa 4 mbere y’ivuka rya Kristo ubwo na none Israel yongeye gutegekwa n’abakoloni b’Abaroma bari bayoboye byinshi mu bihugu byo mu burasirazuba bwo hagati.

Kugeza no mu ivuka rya Yesu Kristo, Israel yari munsi y’ubutware bw’ingoma y’Abaroma iyobowe na Kayisariya wari ufite icyizaro cye mu Butariyani bw’ubu.

Abayuda bajyanye i Yerusalemu kumwereka Urusengero rwa akataraboneka, nk’uko Bibiliya ibigaragaza; Matayo 24: 1-2 Yesu asohoka mu rusengero. Akigenda, abigishwa be baramusanga bashaka kumwereka imyubakire y’urusengero
Arababwira ati “Ntimureba ibi byose? Ndababwira ukuri yuko aha hatazasigara ibuye rigeretse ku rindi ritajugunywe hasi.”

Muri icyo kinyejana cya mbere nyuma y’ivuka rya Yesu Kristu nibwo ubwami bw’Abaroma bwashenye bidasubirwaho Ubwami bw’Abayuda, ndetse na rwa rusengero rurasenywa nk’uko Yesu yasize abibabwiye.
Kugeza icyo gihe, nta gihugu cyitwaga Palestina cyangwa abantu bitwaga Abanyepalestine bari barigeze kubaho.

Ni muri icyo kinyejana, ubwo Umwami w’Abaroma witwaga Publius Aelius Hadrianus Augustus yategetse ko zina Israel-Abayahudi rivaho burundu hanyuma rigasimbuzwa Palestina, ndetse anategeka ko Yerusalemu ihundurirwa izina ikitwa Aelia Capitolina.
Ibyo byakurikiwe n’iyicwa ry’Abayahudi batagira uko bangana, abandi benshi cyane baragurishwa mu bunyage nk’abacyakara abandi batatanira mu bihugu bitandukanye ku Isi.

Palestina icyo gihe yahise iturwa n’Abarabu bakomokaga mu bihugu bya Jordan, Syria, Lebanon na Iraq.
Nguko uko amateka agaragaza uko Israel ya mbere yarangiye hakavuka Palestina.

Mu gice gikurikira tuzarebera hamwe uko Israel yongeye kubaho ndetse n’uko Yerusalemu yabaye umurwa muku wayo. Tuzareba kandi icyo Bibiliya ivuga kuri Israel ya none ndetse na Yerusalemu.

Amahoro y’Imana akomeze kubana namwe.

BIZIMA [email protected]