​​Uko biri kose impanda izavuga abera tuzamurwe


1 Tesalonike 4: 16-18 Kuko Umwami ubwe azaza amanutse ava mu ijuru aranguruye ijwi rirenga, hamwe n’ijwi rya marayika ukomeye n’impanda y’Imana, nuko abapfiriye muri Kristo ni bo bazabanza kuzuka, maze natwe abazaba bakiriho basigaye duhereko tujyananwe na bo, tuzamuwe mu bicu gusanganirira Umwami mu kirere. Nuko rero tuzabana n’Umwami iteka ryose. Nuko mumaranishe imibabaro kubwirana ayo magambo.

Bibiliya idusobanurira ko kubaho kw’isi cyangwa ingengabihe y’isi igaragara mu he 7

1. Igihe cy’ubuziranenge ( Igihe Adamu na Eva bamaze bataracumura)
2. Igihe cy’umutima nama, ( Kuva kuri kayini kugera kuri Nowa)
3. Igihe cy’ubutegetsi bwa muntu ( kuva ku urubyaro rwa Nowa kugera kuri Abraham.
4. Igihe cy’amasezerano. ( Kuva ku urubyaro rwa Abraham kugera kuri Mose).
5. Igihe cy’amategeko (Kuva kuri Mose kugera kuri Yesu)
6. Igihe cy’ubuntu (Ingoma ya Yesu kugeza igihe cy"imyaka 1000).
7. Igihe cya nyuma yo kuzamurwa kw’itorero

Ibi bihe byose uko ari 7 bigenzurwa kandi n’ibyumweru 7 byahanuwe na Daniel mu bice l 9: 20-24. Mu gihe cya Cyera byari bigoye kubyumva ariko uko iminsi yagiye iza buri gihe cyagiye gisohora kuburyo kuri ubu ibyanditswe byera byerekana ko tugeze mu gihe cy’ubuntu. ( Abaroma 5, 6, 11, 12, 1Kor 1:4) Bityo harabura igihe gito kitazwi uko kingana ngo itorero rizamuke.

Iyo witegereje ibimenyetso bibiliya ivuga bizabanziriza kuza kwa Yesu usanga byinshi byaramaze gusohora ndetse abantu bamaze kubifata nk’ibisanzwe mu buzima babayemo, twavuga nk’impuha z’intambara, inzara, kwikunda, Gukunda impiya , kutumvira ( 2 Timoth 3:1), ibigendanye n’ihindagurika ry’ubutegetsi bukomeye buzayobora isi byinshi byamaze gusohora, ibirebana n’ukwiyongera kw’ubwenge n’ikoranabuhanga mu isi n’ibindi..

Ni yo mpamvu iki atari igihe cyacu cyo gusinzira,ahubwo ni igihe cyo kwitegura, ku uruhande rwe Satani we arakorana umwete kuko azi neza aho ibihe bigeze, arahuma benshi amaso ngo bazatungurwe ariko uko biri kose abari maso Yesu nahamagara amazina yabo bazitaba, baba barapfuye bakiranuka cyangwa bakiri bazima bazazamurwa mu bicu basanganire umwami wacu Yesu mu kirere.

Iyi minsi yanteye kugira ubwoba bukomeye ko impanda ishobora kuzatungura benshi, kuko uko turimo kuyegera turimo kurushaho gukunda isi kurusha ijuru, ikirushaho gutera ubwoba ni uko abo Imana yatoranije ngo bakore umurimo wabo mu isi, aribo bari ku isonga mu kudukundisha isi, nyamara ntabwo dukwiye kwibagirwa ijambo ry’impuguro Pawulo yandikiye Tito 2:11 ngo: Kuko ubuntu bw’Imana buzanira abantu bose agakiza bwabonetse, butwigisha kureka kutubaha Imana n’irari ry’iby’isi, bukatwigisha kujya twirinda, dukiranuka, twubaha Imana mu gihe cya none, dutegereje ibyiringiro by’umugisha, ari byo kuzaboneka k’ubwiza bwa Yesu Kristo, ari we Mana yacu ikomeye n’Umukiza.

Torero ry’Imana nongere mbibutse Yesu azaza nta kabuza, uko yahanuwe bwa mbere akaza aje kuducungura nyuma akazamuka ajya mu ijuru ni nako azagaruka nk’uko abamalayika babwiye intumwa ze ngo uko mumubonye agiye niko azagaruka, kandi naza azahagarara ku bicu ahamagare amazina, yacu atujyane iwacu mu ijuru (abafilipi 3:20) none se iryawe riri mo ?

Ndagirango mbabwire nanjye nibwira Impanda izavuga Kandi Bibiriya irambwira ngo izavugira rimwe ku isi hose Itorero rizamurwe,byaba ari akaga njye ubabwiriza Aya magambo ivuze nkasigara. Byaba ari akaga ivuze ku cyumweru ugasigara uhagaze mu rusengero urimo kubwiriza cyangwa Kuririmba. ariko turacyafite ibyiringiro ubwo ubuntu bw’Imana buzanira abantu bose agakiza bwabonetse kandi butarashira munyemerere twegere Yesu, we banze ryo kwizerwa tumwereke intege nke zacu, Yitanze ku musaraba ku bwacu ​ngo Umwizera atazarimbuka nawe uyu munsi numwemerera izina ryawe rirandikwa mu gitabo cy’ubugingo.

​Yesu abahe umugisha. Ernest RUTAGUNGIRA​